Ioh skul higher secondary ka shnong Wahiajer da ka jingkyntiew kyrdan iaka Nephington Laloo Memorial

Syllad | The Rising MeghalayaMay 11, 2024

Ka shnong Wahiajer, West Jaintia Hills kawei na ki shnong kaba don lai tylli ki skul haka kyrdan secondary, mynta kala ioh noh sa iaka kyrdan Higher Secondary da ka jingkyntiew kyrdan iaka Nephington Laloo Memorial Secondary School sha ka kyrdan Higher Secondary School.

Ka Nephington kaba la shakri la la palat 30 tylli ki snem ban sam jingnang jingstad ha kane ka shnong, hynrei dei mynta ka kynti ka bor pyniaid jong ka skul kala shim iaka sienjam ban sdang noh sa iaka kyrdan Higher Secondary, kata haka klas 11 bad 12 Arts ban pynsuk iaki khynnah ban ioh bteng iaka jingpule hala shnong.

La plie paidbah ia kane ka higher secondary section da ka District School Education Officer (DSEO), West Jaintia Hills District ka Kong A.P. Syiem haka 10 tarik Jymmang haka jingialang kaba long ha iing skul. La iadonlang u Assistant Waheh Shnong Wahiajer Bah L. Shylla, ki nonghikai, ki khynnah skul, ki kmie ki kpa nalor kiwei haka jingialang kaba la pyniaid da u Chairman Bah W Lyngdoh.

Ka Kong A.P. Syiem kum ka kongsan haka jingkren kala ong, ka Nephington Laloo Memorial Secondary School kadei kaba nyngkong ha Wahiajer ban plie iaka kyrdan Higher Secondary School bad ka la aikhublei ia baroh kiba don bynta ban pynurlong ia kane ka kam ba bha.

“Kam dei kaba suk ban seng iaka skul, kane ka jinglah kane ka skul ban kiew sha kane ka kyrdan ka pyni iaka jingtbit bad jingshempang jong ki nongpyniaid”, la ong ka Kong Syiem bad kala kyntu ruh iaki khynnah skul ba kim dei ban leit skul tang ban pyndep ia ka eksamin, hynrei ki dei ban pule ba ka jingtip ba ki ioh kan neh ha ka jingim jong ki.

U Secretary ka School Managing Committee, Bah S Laloo ula iathuh ba iaka skul la seng ha u snem 1987 haka kyrdan Lower Primary School bad ha u snem 1996 shaka Upper Primary School, ha u snem 2006 kala kiew sha ka kyrdan Secondary School bad ha u snem 2024 kala ioh iaka jingkyntiew kyrdan shaka Higher Secondary School nalorkata iaka kyrdan Secondary la ithuh da ka tnat Education ha u snem 2015.

“Naduh ba ngi la kyntiew kyrdan ia kane ka skul sha ka Secondary Level, ka skul ka la ioh ia ka record 100 percent pass percentage, lait noh ha ki ar tylli ki snem”, la ong u Bah S. Laloo.

Ula iathuh ruh ba ki don haduh 21 ngut ki nonghikai naduh Class Nursery haduh Class-X bad 235 ngut ki khynnah kynthup 102 ki khynnah shynrang bad 133 ki kynthei.