Ioh surok bad lynti iaid kjat ka shnong Pamrakmai na ka skim bylla 100 sngi

Syllad | The Rising MeghalayaMay 5, 2022

U Deputy Commissioner East Jaiñtia Hills District, u Abhilash Baranwal, IAS haka sngi Palei ula plie paidbah ïaka surok iaid kjat bad ka surok dewbilat hapoh ka shnong Pamrakmai, East Jaintia Hills District.

Kane ka surok ne ka lynti iaid kjat la trei lyngba ka skim bylla 100 sngi ne ka Mahatma Gandhi National Rural Employment Guarantee Scheme (MGNREGS). Ka VEC jong ka Pamrakmai kala shna kawei ka surok kaba jrong 550 M haka jinglut kaba T. 27,86,187/- bad ïaka lynti ïaid kjat (Footpath) kaba jrong 680M la pyntrei haka jinglut kaba T. 22,61, 845/-.

Nalor u Deputy Commissioner la don lang ruh u Dr. Tammiyaki Shylla BDO, Wapung C&RD Block, ki nongïalam shnong bad ki nongshong shnong haka jingïalang kaba la pynïaid da u waheh shnong u Bah Iaikiewbha Rymbai bad la ïoh ki kyntien pdiang burom na u Chairman shnong u Jamris Siangshai.

U Deputy Commissioner ula iaroh ïaka jingtrei shitom bad pyntrei hok ka VEC ne ki nongïalam shnong ïa kane ka skhim bad ula kular bad kloi ban ïarap ha kino kino jingeh.

U BDO ula kyntu ïaki nongshong shnong ban don iaka mynsiem jingiatreilang khnang ban jop ban pyntrei ia kino kino ki skim sorkar hapoh shnong poh thaw.

La ïoh ruh ka jingkren na u N Saioo BTA Wapung C&RD Block, u Secretary Shnong u Wellson R D Siangshai bad kiwei kiwei ki riew rangbah jong ka Shnong.

Ha kane ka sngi la pynkup burom ruh ïaki trai jaka bad ki nongkitkam ba nyngkong jong ka VEC kynthup u Archi Siangshai Chairman VEC bad Secretary Phringstar M Pariat.

Ka Dorbar shnong ka la aiti ruh ïaka dorkhat ha u DC ban pynïoh ïaka ïing dorbar ba thymmai ïaka shnong.

Ïaka jingïalang la pynkut da ki kyntien ai khublei na ka Secretary VEC ka Kong Ronica Dkhar.