Ïoh surok plastic ka shnong Ratacherra ba shongdor T.58 lak

Syllad | The Rising MeghalayaJune 23, 2019

JOWAI: U MLA jong ka Sutnga Saipung u Ma Shitlang Pale ula plie paidbah ïaka surok plastic kaba tip kum ka “Plastic Cell Technology Road” haka shnong Ratacherra haka sngi Saitjaiñ.

Kane ka surok ka dei kaba jngai kumba 1.5 KM kaba pyniasoh iaka surok shnong jong ka dong Newhill bad ka surok bah NH 6. Ïa kane ka surok la pyntrei da ka Khliehriat C&RD Block bad VEC Ratacherra naduh u Nailur bad la lah ban pyndep ha bnai Jymmang 2019.

Ka jinglut ban shna ïa kane ka surok kala kot T.58,58,300 kaba bei pisa da ka MEGHA LAMP haka jingiatreilang bad ka MGNREGA.

U Ma Shitlang Pale haba kren haka jingialang plie ia kane ka surok plastic ula iaroh iaka Khliehriat C&RD Block bad ka VEC Ratacherra kaba la shimkhia ban pyniaid shakhmat ban shna ia kane ka surok ban wanrah ki kam pynroi haka thain nongkyndong bad ban pynurlong ïa kane ka jingangnud jong ki paidbah.

U Deputy Commissioner, East Jaiñtia Hills District u Bah FM. Dopth ula ong ba ka jingthmu ban shna ia kane ka surok ka long ban pynsuk iaki paid nongrep khamtam haka leit ka wan bad ka kit ka bah ban pynpoi ia u marrep sha ki shnong ki thaw bad sha ki iew ki hat.

Ha katei ka sngi la iadonlang u Bah S Marwein, BDO Khliehriat, ka Kong O. Swer JE BDO office, Khliehriat nalor u Desous Pohshna Waheh Shnong Ratacherra bad kiwei kiwei haka jingialang kaba la pyniaid da u Khamsngurbha Pohing Waheh barim ka shnong Ratacherra.