Ioh thep vote ki Pnar na Block I; poi ka vote 7150 na ka 8069 haki jaka khappud Assam-Meghalaya

Syllad | The Rising MeghalayaFebruary 22, 2025

Ka jingthep vote MDC sha ka Jaintia Hills Autonomous District Council (JHADC) haka 21 tarik Rymphang ha ki jaka khappud ka West Jaintia Hills District, Meghalaya bad West Karbi Anglong District, Assam kala long kaba iaid beit iaid ryntih khlem kino kino ki jingjia.

Ka jingthep vote ha ki artylli ki polling station jong ka shnong Mukroh kaba hap hapoh Barato Mukroh Constituency, kaba don markhap ba ka West Karbi Anglong District ka poi haduh 1427 votes na ka 1672 votes. Katba ha ka shnong Saba ka vote kala 550 na ka 630 vote.

Kiwei pat ki jaka thep vote kynthup haka shnong Tum Tum haduh 5 baje nohphaisngi 1861 ngut kynthup iaki kynthei bad shynrang ki la wan thep vote na ka 2119 votes.

Ka polling station ha Tum Tum ka dei na ka bynta ki nongshnong ka Myntangtihwieh, Pdienlapatien, Khatkasla, Psiar bad ka Mowlber.

Ha ka shnong Saphai kaba hap ha Saphai Sahsniang Constituency kaba hap ha khappud ka West Jaintia Hills bad ka Dima Hasao District, Assam, ka jingwan poi ka vote ka long 1572 ngut na ka 1953 ngut ki nongthep vote.

Haka thain Khanduli kaba hap haka Mynsngat Khanduli Constituency kaba hap haka jaka khappud bad ka West Karbi Anglong District ka la kut ha ka por bala buh bad ka jingwan ki nongthep vote kalong kynjoh sha ka 1695 na ka 2070 ngut.

Ha kawei pat ka liang, ki Pnar na ki shnong Pnar hapoh Block-I, ki la iohlad ban wan thep vote suk khlem kano kano jingpynthut hadien ka jingshimkhia jong ki bor pyniaid district jong ka West Jaintia Hills District bad ka jingiatrei bor bah jong ka West Karbi Anglong District kiba la pynbiang bor pahara na ka bynta ban pynsuk ka leit ka wan jong ki Pnar na Block-I sha ki shnong ha West Jaintia Hills District.