Ioh um ka shnong Ratacherra na ka skim JJM ba T.5 klur

Syllad | The Rising MeghalayaAugust 17, 2024

Hadien hynniew snem ka jingshah shitom bad jinglut ka pisa ka pilain na ka bynta ban thied umbam um dih, ki nongshong shnong jong ka Shnong Ratacherra kaba hap haka khappud Assam-Meghalaya ki la pynpaw ia ka jingkmen kaba khraw halor ka jingseisoh jong ka jingpyntreikam iaka skhim Jal Jeevan Mission bala bei tyngka da ka Sorkar Kmie namar mynta ka umbam umdih ka long kaba pahuh pahai bad kaba poi ha man ka tylli iing.

Iaka skhim JJM ha Shnong Ratacherra, East Jaintia Hills District la pyntreikam hapoh ka kyrteng Ratacherra Water Supply Scheme (WSS) Mission ha ka jinglut kaba kot T. 5, 54,32,300/-

La sdang pyntrei ia kane ka projek ha u bnai Nohprah (December) 2022 bad la pyndep pat iaka hapoh Shisnem Phra bnai da ka jingthmu ban pynbiang ka umbam umdih man ka sngi sha ki 400 tam tylli ki longïing jong ka shnong Ratacherra.

Iaka um la tan naka tyllong kaba tip kum ka Karia kaba jngai 16-kilometre naka shnong Ratacherra.

Ha ka sngi Thohdieng mynta ka taiew, ka Kong R Kynjing Executive Engineer PHE Electrical Division kala plie paidbah ia kane ka skhim JJM jong ka shnong Ratacherra ha ka jingialang ba la pyniaid da u Waheh shnong Bah Pynkhlain Dhar, ha Community Hall ka shnong.

La donlang u Bah P. Syrti J.E RWS, Jowai, u Bah D. Pala Contractor bad u Secretary Shnong Bah Bujli Sumer, kumjuh ki dkhot ka Village Water & Sanitation Committee (VWSC) ba kynthup ia u Chairman Bah Desous Pohshna, Secretary Bah K. Pohlong nalor kiwei kiwei ki riew Rangbah jong ka shnong.

Ka Kong R. Kynjing haka jingkren ka long kane ka sngi kamdei tang ka jingplie paidbah ia kane ka skhim hynrei ka jingaiti noh iaka Um ha man ki longiing jong ka shnong Ratacherra.

Kala kyntu iaki longiing ka shnong ban don ka jingkitkhlieh bad sngewtrai ia kane ka skhim da kaba sumar sukher iaki jaka pyllang um kumjuh ki pipe umkor kiba wan sha ki thliew iing khnang ba kane ka um kan neh 30 snem kumba la mang da ka JJM.

Ka Kong Kynjing kala aikhublei ruh iaki nongshong shnong kiba la ai ka jingkyrshan ha ka jingpyntreikam ia kane skhim hapoh ka shnong bad ka pynpaw ruh ka jingsngewnguh iaki ophisar jong ka tnad PHE Jowai kiba la trei shitom ban pyndep ia kane ka skhim na ka bynta ban pynpoi iaka umbam umdih sha ki longiing jong ka shnong ka Ratacherra.