Ithuh 2 ngut naki 4 ngut ba shah pyniap ha East Jaintia Hills, suba ba dei ki nongkhaii drok

Syllad | The Rising MeghalayaJuly 6, 2024

Ki sawngut ki briew kiba la shah pyniap dusmon ha ka shnong Umpleng, East Jaintia Hills la suba jur ba ki dei ki briew kiba dih bad kiba khaii drok, bad napdeng kine la lah ban ithuh ia arngut na ki ha kaba uwei u dei uba la tip kyrteng kum u Nasar Kyndait 33 snem rta na ka shnong Dkhiah East Pohshnong, East Jaintia Hills bad uwei pat u Ravi Rai 23 snem rta uba dei na Elam, Nepal.

Ia ki metiap jong kine ki sawngut ki briew kiba la shah pyniap dusmon da kaba teh lang hajuh ia ki kti ki kjat bad mait da ki kynja wait na ki bynta jong ka khlieh bad ryndang la lap da ki nongshong shnong ha ka 6 tarik Naitung na lyndet jong ka iew Umpleng, East Jaintia Hills. La suba ruh ba kine ki briew ki lah ban shah pyniap sha kawei ka jaka bad la shu wan bret ia ki met iap ha kane ka jaka.

Na ka liang u Superintendent of Police ka East Jaintia Hills, u la ong namar ka jingshah pyniap jong kine ki sawngut ka la long ha ka rukom kaba kham i shyrkhei, kumta ruh na ka liang ka tnad pulit ka la thaw ia ka kynhun tohkit ba kyrpang Special Investigation Team (SIT) ban iarap lem ha kaba pynlong ia ka jingtohkit halor kane ka jingjia.

Na ka liang ki heh pulit ha ryngkat ka kynhun CSU, Mobile forensic Crime scene unit bad u Magistrate ki la wan poi mar mar sha kane ka jaka ban bishar bniah ia ka jinglong jingman bad hadien ka jinglum ia ki sakhi satar la pynkynriah noh ia kine ki metiap shapoh Civil Hospital Khliehriat ban leh ia ka post mortem.