Ithuh ka NABL iaka State Food Testing Laboratory Meghalaya kum kawei ka jaka wad bniah kyrpang ka thain Shatei Lam Mihngi
Ka State Food Testing Laboratory, Meghalaya, ka kylla long mynta ka shlem wad bad pule bniah ba nyngkong napdeng ki jylla shatei ka thain lam mihngi ka ri lyngba ka FSSAI ba kan ioh ia ka jingithuh bad ba kan lah shi syndon ba kan pyndonkam ia ka shap ne ka muhor jong ka NABL naka bynta ka jingwad jingtip ba kham bniah halor ka Biological Testing.
Ban shu batai lyngkot ka dor jong kane ka syrnot ba ka State Food Testing Laboratory ka Pasteur Institute kala ioh, ka long ka jingkyrkhu bah ba na sha lyndet bad kaban lah ban wanrah bad ban ai jingmyntoi ia ki paidbah nongshnong jong ka jylla bad ia ka dong ka thain shatei lam mihngi jong ka ri, namar ha kane ka shlem wad bad pule bniah, la lah ban leh ia ki jingwad bniah (test) ban shaphang ka jinglong jingman jong ki jingbam jingdih bad ka kaiphod (report) kaba mih paw na kane ka shlem yn ithuh bad pdiang ia ka kum ka kaiphod kaba pura ha ka ri baroh kawei kawei.
Ia kane ka syrnot ne ka National Accreditation Board for Testing and Calibration Laboratories for ‘Biological Testing’ ka jylla ka la ioh ba kan pdiang ia ka ha ka 06 tarik mynta u bnai Risaw 2021 bad naduh kane ka khyllipmat ba ka jylla ka la ioh ba kan pdiang ia kane ka syrnot la shah ne ailad ia ka State Food Testing Laboratory jong ka state Meghalaya ka lah ba kan da ioh ba kan pyndonkam ia ka shap ne ka muhor jong ka pyndonkam noh ia ka shap jong ka NABL.
Na ka jingiakren bad ki riew shemphang bad ba la dep ban pule pyntbit ia kane ka bynta jingpule, la sngewthuh ba kane ka dei ka sien jam ba nyngkong ba kane ka shnat treikam ba kan lah ba kan kynjoh ia kane ka kyrdan ban ioh ia ka jingithuh naka NABL ha kaba ka state food testing laboratory jong ka jylla, mynta la ithuh bad tip ia ka ha kane ka ri India baroh kawei. Hynrei ban lah ban kynjoh ia kat kane ka thong, ka donkam shisha ia ka mynsiem trei shitom ban len lade bad ban hap shisha ban aiti met bad mynsiem, ha kaba ka kam hi ka dawa ban trei da ki bun bun ki kynta ha ka shi sngi.
Naka liang ki samla sengkam seng jam lajong kum Dasumarlin Majaw ki ai khublei ia ka state food testing laboratory jong ka sorkar jylla, kaba hapoh ka jingialam jong ka Dr Wadamika Lyngdoh, kiba la trei shitom ban lah ha kaban pynioh ia kat kane ka nam bad kaba khamtam eh ia ka syrnot jingithuh na ka NABL, kaba long ka jingkyrkhu bah na shalyndet ia u paidbah bad ia ka jylla hi baroh kawei.
Kumta na ka liang Dr Wadamika Lyngdoh kaba bat ruh iaka kyrdan kum ka Assistant Food Analyst ryngkat bad kane ka ophis hi baroh kawei ki kyrmen ba da ka jingioh ia kane ka jingithuh na ka NABL, kan iarap ia ki paidbah nongshnong jong kane ka jylla da ka jingkyrmen ba kin iai bteng ban ai ia kata ka jingshakri kaba kham bha shuh shuh ia lyngba ka jingioh ka jong ka ia kane ka jingithuh bad ban lah ruh ban kynjoh sha katta ka thong kumba la ia thmu.
Facebook
Instagram
Youtube
Twitter
Leave a Reply