Ithuh ka Sorkar Meghalaya ia bun ki ‘Law Kyntang kum ki jaka ba la ai jingiada: Myntri sorkar pdeng

Syllad | The Rising MeghalayaAugust 10, 2023

Ki kynhun tynrai kum ki durbar shnong ha jylla Meghalaya ki don ka bynta kaba kongsan ha ka imlang sahlang jong ka jylla Meghalaya bad ka ioh ka kot, ha kaba iadei bad ka jingpynneh pynsah ia ka mariang bad ka jingai jinghikai shaphang ki rukom kiba lah ban iai neh.

Na ka liang u Myntri ka Sorkar Pdeng ba dei khmih ia ka Tnad Development of North Eastern Region (DoNER) u G. Kishan Reddy ha ka jubab ba shu thoh ha iing dorbar thawain Rajya Sabha haka sngi Palei, u la ong ba ka Sorkar Meghalaya ka la dep ithuh ia bun ki ‘law kyntang kum ki jaka ba la aijingiada ne ki Community Reserve hapoh ka Wildlife (Protection) Act, 1972. Kumjuh ruh, ki skhim Integrated Development of Wildlife Habitats bad Compensatory Afforestation Fund Management and Planning Authority (CAMPA) ba ba la bei tyngka da ka sorkar pdeng ki la wanrah ka roi ka par sha ka imlang sahlang da kaba plie ki lad kamai jakpoh na ka bynta ki nongshong shnong.

Ua la ong ruh ba ki jaitbynriew ha ka thain bad ki kynhun tynrai ha Meghalaya ki ia don bynta ha ka jingsaindur ia ka roi ka par, ka jingai jingkyrshan ia ki Village Employment Council, ka jingithuh ia kiba dei ban ioh jingmyntoi ia ki prokram bapher bapher jong ka sorkar, ka jingdon ka jaka shnong na ka bynta ban shna ia ki projek, ka jingpyniaid ia ki jingdon jingem jong ka imlang sahlang bad kiwei kiwei na ka bynta ka roi ka par jong ki jaka riewlum ha ka jylla.