Jah rngai u rangbah na Mawryngkneng uba leit trei bylla sha Wahiajer, Narpuh

Syllad | The Rising MeghalayaDecember 21, 2024

Uwei u rangbah uba kyrteng u Bah Blanstar Kharsati ba ju khot ieid u Bah Lan 48 snem rta uba shong ba sah ha Mawryngkneng Pdeng Shnong, East Khasi Hills u la jah rngai na ka jaka kaba u leit trei bylla sha Wahiajer, Narpuh, East Jaintia Hills bad ym pat shym la lapdien shuh kat haduh mynta.

Na ka liang jong ka Kong Kyntilang Kharsati kaba shong ba sah ha Mawryngkneng bad kaba dei shipara bad u Bah Blanstar ha ka 22 tarik Naiwieng ba la dep ka la leit ban ujor hapoh Lumshnong Police Station ha kaba iadei bad kane ka jingjah rngai ka jong u kaba la jia naduh ka taiew ba ar jong u bnai Naiwieng ba la dep na ka jaka leit trei bylla ha Wahiajer, Narpuh.

Ka la pyntip ruh ba ki la pynlong ka jingwad hynrei kim shym la lapdien satia kat haduh mynta.

U Bah Blanstar uba dei u khun jong u (L) Bah Dwor Lawai u dei u rangbah uba kham dum sniehdoh, uba pdeng briew ha ka met ka phad, u don ka ryngieng kumba 5.4 phut, uba kham pyllun dur bad mih khmut bad uba don ka sur kren kaba suki.