Jah trei u ophisar ka Tnat Tourism, kyntu tuklar ka JNC ha u DC Khliehriat

Syllad | The Rising MeghalayaAugust 31, 2023

Ka Jaiñtia National Council (JNC) Khliehriat Circle, hapoh ka jingialam u General Secretary, u bah Mebanteilang Sukhlaiñ, mynta ka sngi Palei ka la leit jurip ia ka tnat  treikam ‘Tourist Officer and Information Centre’ ha Khliehriat bad ki la lap ba watla ka ophis ka plie hynrei kam don nongtrei.

Na ka liang ka JNC haba wad bniah ka la ioh jingtip ba u heh ophisar uba dei peit ia katei ka Centre um ju wan trei mynta la don kumba shi snem ei ei bad kaba la pynkyndit shibun ia ki nongialam ka seng.

Kumta na ka liang ka JNC ka la dawa ka jingpynshai na utei u ophisar jong katei ka Centre Khliehriat  halor ka jingbym poi trei jong u namar kane ka jingbym don u heh sorkar ka buh jingeh ïa ki paidbah kiba donkam ha ki kam ki jam kiba thmu ban kyntiew ia ka kam jngohkai hapoh kane ka district.

Ha kajuh ka por ka JNC ka buh ruh ka jingjingkylli ba ka sorkar ka siew tulop ne em ia kine ki nongtrei bym ju wan trei.

Kumba ka paw ka ka JNC ka la ong ba bun ki jaka jngohkai kiba don ha kane ka thaiñ ki long kiba i donkam shisha ban ioh ia ka jingiarap na kane ka tnat treikam khnang ban wanrah ki jingmyntoi ym tang ia ka shnong ne ia ka thaiñ hynrei iaka jylla hi baroh kawei.

Shuh shuh na ka liang ka JNC ka kyntu bad maham ruh ia ka sorkar  ba kam dei ban ialehkai ia ka pisa jong u paidbah. Nalor kata ka JNC ka la iakynduh ruh ia u Deputy Commissioner ka EJHD u A Baranwal na ka bynta ban leh eiei ha kaba iadei bad katei ka tnat treikam khnang ba kan lah ban ai ka jingshakri kaba pura ia ka thaiñ.