Jam ka 7 Thyndai Childcare Institute Cum Counselling Centre ia u mawmer ba san snem

Syllad | The Rising MeghalayaAugust 25, 2022

Ka 7 Thyndai Childcare Institute Cum Counselling Centre, Tuber Kmaishnong, East Jaintia HIlls District kala jam ia u mawmer ba san snem ka jingiaid lynti jong ka ha kaban shakri ia ki para briew khamtam ki khynnah kiba wan na ki longiing kiba kyrduh.

Ka Seiñraij Tuber Women’s Wing kaba pyniaid ia kane ka centre kum shibynta ban lehkmen iaka lyngkhuh snem ba 5 bala seng nongrim ia kane ka jaka ri khynnah bad ka jaka iasyllok kala pynlong iaka prokram haka sngi Balang.

La pynphuh pynphieng ïaka jinglehkmen da ka jingwan shim bynta ki khynnah skul na ki skul bapher ba don ha Tuberkmai shnong, Mukhaïalong, Wapung Shnong, Mupyut bad Tuber Shohshrieh.

U Myntri sorkar uba long ruh u MLA ka thain ma Kyrmen Shylla bad ka MDC barim kong Violet kila long kum ki kongsan ha kane ka prokram. La iadonlang ruh ki MDC kiba kynthup ia Laski Rymbai, Finelyness Bareh, Deputy Commissioner East Jaintia Hills A Baranwal, Kong R Passah DSWO Khliehriat, u T Kyndiah DCPO Khliehriat, Dolloi Elaka Jowai Ma Puramon Kynjing, Streamly Suchen president KSU, East Jaintia Hills, Waheh Shnong Tuberkmai Shnong u Micky Lyngdoh ki nongkitkam bad dkhot ka women’s Wing bad ki waheh wasian ka raij Tuber.