Jam ka jingiaid lynti ka RBSK prokram sha ka 10 snem, 622 ngut ioh jingsumar ki khyllung khynnah ha Jylla
Shibynta ka jingrakhe iaka lyngkhuh dap 10 snem ka Rashtriya Bal Swasthya Karyakram (RBSK) Program hapoh ka jylla, ka District Early Intervention Centre (DEIC), West Jaintia Hills District kaba hap hapoh ka Rashtriya Bal Swasthya Karyakram (RBSK) National Health Misssion (NHM) jong ka Sorkar Meghalaya haka 15 tarik Jymmang kala pynlong da ka Workshop ba shisngi halor ka phang “Nutrition & Growth”.
Ka jingthmu jong ka Workshop ka long ruh ban pynkhlain iaka rukom pynshai paidbah halor ka RBSK bad ruh ban kyntiew iaka jingiadei hapdeng ki tnad treikam sorkar naduh ka District School Education Office (Mid-Day Meal), Social Welfare, ICDS, bad District Resources Center on Disability Affairs (DRCDA) Civil Hospital Ialong, West Jaintia Hills District.
![](https://www.syllad.com/wp-content/uploads/2024/09/JIT-Vacancy-823x1024.avif)
Ia kane ka Workshop la pynlong ha Tympang Club Complex Iawmusiang, Jowai haka jingdonlang u Deputy Commissioner ka West Jaintia Hills District Bah BS Sohliya, ka Deputy Director Health Services (MCH&FW) Cum State Nodal Officer, RBSK NHM, Meghalaya ka Dr. I. Gatphoh nalor ki doktor, ki ophisar sorkar bad kiwei kiwei haka jingialang la pyniaid da ka Dr. Handaka Suting DEIC Manager, West Jaintia Hills District.
Ka Dr. I. Gatphoh haka jingkren kala iathuh ba Rashtriya Bal Swasthya Karyakram (RBSK) kadei kawei na ki programme hapoh ka National Health Mission (NHM) jong ka Ministry of Health and Family Walfare jong ka sorkar pdeng halor ka thong ban jurip bniah lane screening iaki jait jingpang haki khynnah naduh dangkha haduh 18 snem rta.
Kala ong ba iaka jingwad bniah ne screening la pynlong khnang ban lap iaki khynnah kiba don iaki jait jingpang kiba tip kum ki 4-Ds kata Defect at Birth ka jingduna haka met ka phad haka por ba dangkha, Deficiency-ka jingduna bam, vitamin bad kiwei, Diseases ki jait jingpang kiba lah ban don ne kiba dang sdang haki khynnah bad Developmental Delays and Disabilities ki dak ki shin kiba lah ban ktah iaka jingheh jingsan jong ki khynnah.
Iaka Screening la leh da ki RBSK Mobile Health Team kiba don ha man ki Block haki skul bad ki Aganwadi Centre.
Katkum ka report ka RBSK ha Jylla naduh u Iaiong (April) 2023- Lber (March) 2024 haduh 14 lak tam kiba buh thong ban sumar. La jurip (screening) 1031526 bad la phah sha ki jaka sumar 33960 ngut ki khynnah khyllung.
Kiba ioh iaka jingsumar ki kynthup ia ki CHDs (Congenitial Heart Defect) ne ka jingpang klongsnam haudh 222 ngut, Club Foot (Kdor kjat) 142 ngut bad kiba kad shyntur (Cleft Lip and Palate) 258 ngut.
Shuh shuh ka Dr. Gatphoh kala ong, ba kane ka programme kam shym la kynthup tang ka jingleh Screening hynrei lada lap ia kiba kum kine ki jait jingpang haki khynnah kynthup ka jingkad haki shyntur, kad pohktien, kdor kjat, ka jingpang klong snam, jingpang skhor, khmat bad khmut la iarap ruh ban ai jingsumar ei khnang ba kin ioh iaka jingheh jingsan haka met ka phad bad ka long rynieng kaba pura.
Naka liang ka Dr. I. Gatphoh kala kyntu ia kino kino ki kmie ki kpa kiba don iaki khun kiba la kha hapdeng ka jingduna ki dkhot met ki lah ban wan sha ophis District Early Intervention Centre (DEIC) kaba don ha Panaliar Jowai, ka ban sa pyntip kumno ban ai jingsumar iaki khun jong ki.
Haba kren haka jingialang, u DC Bah BS. Sohliya, IAS ula iaroh iaka tnad ka koit ka khiah bad ia baroh kiba don bynta halor ka jingjop jong ka jingiaid lynti kaba 10 snem ka RBSK hapoh ka Jylla kumjuh haka District.
Iaki jingbatai ba bniah halor ka rukom treikam bad ki lad jingiarap ba ki paidbah ki lah ban ioh lyngba kane ka skhim la batai da ki riew shemphang napoh ka Meghalaya Health Systems Strengthening Projects bad State RBSK.
Shibynta jong kane ka jingrakhe la pynlong ruh iaki jait jingiakop na ka bynta ki khynnah jong ka Mynthong LP School kynthup naduh ka jingbuh itynnad iaki jhur, ka jingdro dur, ka jingthung tynrai dieng bad ka jinghikai halor ka Tiffin Box bad Balance Meal ba la batai da ka Kong Habari Warjri.
![](https://www.syllad.com/wp-content/uploads/2024/05/RBSK-Workshop-1-1250x703.webp)
![](https://www.syllad.com/wp-content/uploads/2024/05/RBSK-Workshop-2-1250x703.webp)
![](https://www.syllad.com/wp-content/uploads/2024/05/RBSK-Workshop-4-1250x703.webp)
![](https://www.syllad.com/wp-content/uploads/2024/05/RBSK-Workshop-5-1250x703.webp)
![](https://www.syllad.com/wp-content/uploads/2024/05/RBSK-Workshop-3-1250x703.webp)
Leave a Reply