Jam ka Jylla sha uwei pat u mawmer da ka jingplie ïa ka PRIME Hub ha Wahiajer
U Myntri Rangbah ka jylla Meghalaya, u Conrad K Sangma u la plie ïa kawei na ki shlem ai jinghikai bad ïarap na ka bynta ki nongseng kam lajong kaba la ju tip kum ka PRIME Hub haka 23 tarik Kyllalyngkot, ha ka shnong Wahiajer, kaba hap hapoh ka Thadlaskein Community bad Rural Block, West Jaintia Hills. Ki kynrem ki lyndan kiba la don lang ha kane ka sngi plie ki kynthup u Symbud Myntri Rangbah ka jylla u Bah Prestone Tynsong, u Symbud Myntri Rangbah ka jylla u Ma Sniawbhalang Dhar, U Myntri ka tnad Cooperation u Ma Comingone Ymbon napdeng kiwei de ki riewkhmat ka thaiñ.
U Conrad Sangma haba kren ula pynpaw halor ki sienjam ba kongsan ba la don bynta da ka imlang ka sahlang ban poi sha kane ka thong ban plie ïa kane ka shlem kum ka PRIME HUBs. “Ha manla ki blok ha ka jylla, kan don ka PRIME hub bad kynthup ka jingdonlang kiba bun ki shnat treikam kiba lah ban khmih ka jingdonkam bad jingdawa jong ki nongrep”, la pynbna u Myntri Rangbah. Ha kajuh ka por ruh u Myntri Rangbah u la kdew halor ka jinglah ban pyntreikam stet ïa kane ka jingtei ha Wahiajer, hapdeng ba la pyndep tang hapoh ki khyndiat bnai. U la pynpaw “ba ka jinglut halor ka jingtei kane ka shlem ka kot sha ka T.4 klur tyngka, bad kumba phi sakhi, baroh ka dei kaba la pyntreikam da ka bording Solar ne ka jingshai jong ka sngi hapdeng ba la pynïaid ïa ki kor pynpjah bad ka bording bad kiwei de ki kor ruh la pyntreikam ha kane ka shlem. Ka thong jong ngi ka dei ban ïohi bad lah ban plie ha baroh kawei ka jylla bad ha baroh ki blok bad ki konstituensi katba ngi lah hapdeng ka jingdonkam ki nongrep lane ki kynhun ha ka imlang ka sahlang”.
Kane ka PRIME Hub kaba plie mynta ha Wahiajer ka dei kaba lah mang khnang halor ka jinglah ban saiñ ïa u shynrai, sying, bad u synsar bad la pharia ban pyntreikam halor ka jinglah ban ai jingtip jinghikai ha kiba bun ki liang kynthup ruh ka jingpyndonkam ka bor ki tekhnoloji na ka bynta ki nongrep, ki seng kynthei bad kito kiba don ka jingthmu ban seng ki kam lajong ha kine ki thaiñ. Ka sorkar ka dei kaba la aiti ruh ban pynurlong halor ka ïoh ka kot kaba arshah na ka bynta ki nongrep bad buh thong halor ka jinglah ban khmihlang ban nangpynroi ka ïoh ka kot khamtam ha ka liang ka jingpynmih u shynrai, u sying, u sohphan, tit, ki musla napdeng kiwei de.
Hapdeng ka jingdon 80 tylli ki ïew pdeng ne ki Collective Marketing Centres, ki don ruh 79 tylli ki jaka ba la mang ban buh sying bad u kwai, 13 (20MT) ki jaka buh ba pynpjah ne Cold Storages, bad 27(5MT) ki jaka buh pynjah ha ki ïew jong ki nongrep, ka sorkar ka don ka jingangnud ban pynsuk pynaram halor ka jingpyntyllun kam ba ïadei bad ka rep ka riang.
Ka sorkar ka aiti ruh halor ka jinglah ban siew kham bha na ka bynta ki nongrep bad kane ka urlong halor ka jingpynleit jingmut ka sorkar naduh ki kam kiba sdang haduh ka jinglah ban saiñ ki jingbam, hapdeng ba don 160 tylli ki micro-processing centres, kiba kynthup na ka bynta u sying, u kwai shynrai, u sohphan, ka jingsaiñ ki umphniang sma iwbih, ki sohehsnep ba kynthup u cashew, u sohmarit bad ka kait kiba lah don ha ka jylla.
Ka don ka jingkyrshan ïa ki nongrep hapdeng ka jingai ram khlem da donkam ban siew ka interest kaba kot haduhT. 12.4 klur naduh u snem 2021-23. Hapdeng ka jingdon mynta hynñiew tylli ki shlem kiba lah treikam bad kiba bun ki dang pynkhreh ka PRIME ka dei kaba la sdang ha u snem 2019, bad thmu ban kyntiew bad ïarap na ka bynta ki nongseng kam lajong lyngba ki rukom ai jinghikai bapher bapher kynthup naduh ka jingai jinghikai na kaba sdang ïa ka kam, ka jingdon ki nongbtin lynti, ka jingïarap pisa, ka jingbei tyngka bad ka jinglah ban ithuh ithaw bad kito kiba ïadei kam.
Ka sorkar ka buhthong ban plie kawei ka PRIME hub ha man la ki block ban kyntiew iaki nongseng kam ha ka kam rep kam riang hala ki jong ki shnong ban shngain bad dap biang ka kam rep kam riang ka jylla.
Facebook
Instagram
Youtube
Twitter
Leave a Reply