Jam ka Lamin XI bad ka Padu Mawsku sha ka semifinal Upper bad Lower Div ka ASSA

Syllad | The Rising MeghalayaJanuary 18, 2025

Ka Lamin XI bad Padu Mawsku kila lah ha kaban bun jaka ialade sha ka semifinal jong ka lympung ialehkai Upper bad Lower Division Football Tournament kaba pyniaid da ka Amlarem Sub-Divisional Sports Association (ASSA).

Kane ka la wan hadien ba ki la khur jingjop haka jingialehkai quarterfinal kaba la long ha madan Mini Stadium Ladjaplem, Amlarem haka 17 tarik Kyllalyngkot.

Haba phai sha ka jingialehkai jong ka kyrdan Lower Division, ka Padu Mawsku kala jop iaka Everlasting Sohkha Shnong da 1-0. Ia kane ka shikol na kaliang ka Padu Mawsku la thep da u Lekirang Pohshna (47).

Katba haka kyrdan Upper Division, ka Lamin XI kala jop da 2-1 pyrshah iaka Seng Samla Shnongpdeng.

Na kaliang ka Lamin XI la thep da u Freedy Gayang (33 & 50) katba iaka Seng Samla Shnongpdeng la thep da u Mewan Lamin (49).

Ka jingialehkai quarterfinal kaba khatduh kan long haka 18 tarik K’Lyngkot. Haka Lower Division ka Mupyut Dongwah kan iakhun pyrshah iaka Hynriam Thangbuli haka por 12.00 baje mynsngi. Katba haka Upper Division kan long hapdeng ka SCC Padu pyrshah iaka Namrhen Ryntih Kudengrim haka por 2.00 baje nohphai sngi.