Jam ka Rymbai Shkenshynriah FC sha ka semifinal Meghalaya State League

Syllad | The Rising MeghalayaJanuary 14, 2025

Ka Rymbai Shkenshynriah SC ka la lah ban pynrem noh ia ka Chipakkore FC da 2-0 ha ka jingiakhun ia ka quarterfinal kaba saw bad kaba khatduh jong ka lympung ialehkai Meghalaya State League 2024 kaba la long ha ka 14 tarik Kyllalyngkot ha PA Sangma Stadium, Tura.

Kane ka jingiakhun ka la long kaba iakhaid bha ha kaba ym shym la don ba ioh pynkhih jar ha ka kylla step jong ka jingialehkai. Hynrei ka jingialehkai ka la sdang ban kylla kynsan hadien ba u rang ialehkai ka Rymbai Shkenshynriah u Hesmiki Rymbai u la ioh ban thep ia ka kol kaba nyngkong ha ka minit kaba 68, bad tang hadien khyndiat minit la pynbud sa shi kol da u Iaishah Bareh ha ka minit kaba 79 kaba la pynthikna syndon ia ka jingjop bad ban ioh rung syndon sha ka semifinal.

Da kane ka jingjop ka Rymbai Shkenshynriah mynta ka la pyniasoh ha ryngkat ka Shillong Lajong, Ladthadlaboh bad ka Mawlai SC ha ka semifinal ha kaba ia ki jingiakhun yn sa pyntip da ka Tournament Committee.

Kum ban shu kdew biang, ka Lajong ka la pynliem ia ka Rangdajied United ha ka quarterfinal ba nyngkong da 3-1 katba ka Ladthadlaboh ka la pynliem ia ka Sutnga da 5-2,  bad ka Mawlai ka la pynliem ia ka Khliehmawlieh da 8-0.

Kane ka lympung ialehkai MSL ba la khot pynlong da ka Meghalaya Football Association ha ryngkat ka jingkyrshan jong ka sorkar jylla kan nang khring shuh shuh ia ki riew ieit football kiba angnud ba ioh sakhi ia ki jingiakhun semifinal.