Jam ka State Level Subroto Mukherjee Cup Football Tournament sha ka semifinal

Syllad | The Rising MeghalayaJuly 26, 2023

Ka State Level Subroto Mukherjee Cup Football Tournament, ba la pyniaid ia ka da ka tnat Directorate of Sports & Youth Affairs ka la jam pat sha ka semifinal, ba la buh ban long lashai ka sngi ka 27 tarik bad ka phainal la buh ba kan long ha ka 28 tarik.

Ha ka U-14 ki khynnah shynrang, ki skul ba la rung sha ka semifinal ki long ka skul na East Garo Hills kaban aireng pyrshah ia ka East Jaintia Hills bud pat sa ka skul na Ri Bhoi kaban aireng ia ka West Jaintia Hills, kine artylli ki jingiakun kin long ha madan ka SAI, STC NEHU ha ka por 9 bad 11 baje mynstep.

Katba ha ka U-17 ki shynrang  ki skul ba la jam sha kane ka kyrdan iakhun ki long ka West Khasi Hill kaban aireng pyrshah ia ka East Khasi Hills, katba ka South West Garo Hills kan aireng pyrshah ia ka East Jaintia Hills, kine ki jingiakhun kin long ha ka por 1:00 PM bad 3:00 PM ha SAI STC NEHU.

Ha ka U-17 ki khynnah kynthei, ka jingiakhun ia ki semifinal kan long hapdeng ka West Khasi Hills pyrshah ia ka Ri-Bhoi District, katba ka East Khasi Hills kan aireng pyrshah ia ka West Jaintia Hills, bad kine ki artylli ki jingiakhun kin long ha Madan Heh Stadium, Mawlai ha ka por 9:00 AM bad 11:00 AM.

Haba phai sha ki jingiakhun ba khatduh jong ka league kiba la long hynne ka sngi, ha ka U-14 ki khynnah shynrang, ka jingiakhun hapdeng ka East Jaintia Hills KB Memorial Sec School pyrshah ia ka Eastern West Khasi Hills Little Star English Medium Sec School ka la kut noh ha ka jingiakhaid kaba long da mar shi kol, katba ka West Jaintia Hills HK Sing Sec School ka la lah ba kan pynliem noh ia ka West Garo Hills St. John Sec School da 11-1, u namtam ha kane ka jingiakhun dei u Budmiha-oo Mukhim uba la lam khmat ia la ka skul ban thep haduh 5 tylli ki kol ba la wan ha ka minit kaba 8,16,37,47,65+ mins.

Ha kawei pat ka jingiakhun, ka South Garo Hills Dabit Ampangdam S.S.A School ka la lah ba kan iakhaid da mar shi kol bad ka West Khasi Hills St. Peter Hr Sec School,  katba u Chanjib Chettri ka Ri Bhoi Myngken Hr Sec School marwei u la ioh ban thep haduh 9 tylli ki kol (10,12,17,21,28,34,50,52,54 mins) bad kane ka la biang pura ia kane ka skul ba kan pynliem da 16-1 ia ka South West Khasi Hills Mawbidong Sec School.

Ka resol ha ka jingiakhun ka U-17 ki shynrang ka East Jaintia Hills Rymbai Presbyterian Hr Sec School ka la lah ba an pynliem da 2-1 ia ka South Garo Hills Nilwagre Sec School, ka Ri Bhoi Mynken Christian Hr Sec School ka la pynliem da 5-0 ia ka South West Khasi Hills Rangthong Christian Hr Sec School, ka East Khasi Hills Assam Rifles Public School ka la pynliem da 2-1 ia ka West Garo Hills Dobasipara Sec School, ka West Khasi Hills Sibsing Govt Memorial Hr Sec School ka la pynliem da 2-0 ia ka East Garo Hills Rongrengiri Govt Hr Sec School.

Katba ka resol na ka jingiakhun ka U-17 ki kynthei, ka East Khasi Hills Iewrynghep Sec School ka la lah ba kan pynliem noh ia ka South West Khasi Hills Rangthong Christian Hr Sec School da 2-1, katba ka jingiakhun hapdeng ka East Jaintia Hills Khliehriat Hr Sec School pyrshah ia ka Ri Bhoi Saiden Sec School ka la kut noh ha ka jingiakhaid kaba long da mar lai kol, katba ka West Jaintia Hills North Liberty Hr Sec School lyngba ka hat trick jong ka Daphimon Khyriem ((11,34,39 mins) ka la biang pura ia kane ka skul ban pynliem noh ia ka South West Garo Hills Birin Nuchong Sec School da 7-1. Ka West Khasi Hills Sibsingh Memorial Govt Hr Sec School ka la lah ban pynliem da 3-0 ia ka East Garo Hills Chachat U.P. School Rongjeng.