Jam quarterfinal sa ka Padu Mawsku bad ka Mupyut Dongwah haka Lower Div ka ASSA

Syllad | The Rising MeghalayaDecember 19, 2024

Ka Padu Mawsku bad Mupyut Dongwah kila jam shaka quarterfnal jong ka jingialekai Lower Division Football Tournament ba la pyniaid da ka Amlarem Sub Divisional Sports Association (ASSA).

Kane kala wan hadien ba kine ki kynhun kila khur nam jop haka jingialehkai pre-quarter final kaba la long ha madan Mini Stadium Ladjaplem haka 19 tarik Nohprah.

Haba phai shaka jingialehkai ka Padu Mawsku kala jop da ka jingiashut tie breaker kaba 6-5 pyrshah iaka Lumkyntar United hadien ba ka jingialehkai haka por ba la buh kala kut da ka jingiakhaid kaba mar 1-1.

Naka bynta ka Lumkyntar United la thep da u Ketda Bapung (35) bad Padu Mawksu la thep da u Lekirang Pohshna (45).

Haka jingialehkai kaba bud, ka Mupyut Dongwah kala pynliem da 3-1 iaka Amsohtai lyngba ka jingiashut tie breaker hadien ba ka jingiakhun haka por ba la buh kala kut noh khlem don mano mano ba lah ban pynkhih iaka jar kol.

Haba phai pat sha ka jingialehkai Super League, ka jingialehkai kala kut da ka jingiakhaid kaba mar 1-1 hapdeng ka Dongmihsngi Mupyut pyrshah iaka YC Pdengkarong.

Iaka kol jong ka YC Pdengkarong la thep da u Special Nongrum (12) bad iaka Dongmihsngi Mupyut la thep da u Planti Lyngdoh (18).