Duna 100 klur ka khajna ka JHADC ka dang ap na ka sorkar MDA

Syllad | The Rising MeghalayaMay 1, 2020

Tang hadien shi sngi baka Jaiñtia Hills District Council Staff Association (JHADCSA) kala rai ban iakhih sangeh treikam khlem buh por namar bym ioh tulop la 7 bnai, u Chief Executive Member (CEM) jong ka Jaiñtia Hills Autonomous District Council (JHADC) Ma Thombor Shiwat ula khot ïaka jingialang kyrkieh jong ka Joint Party Committee ki MDC ka liang synshar ban iakren sani bha halor kane ka kam haka sngi Palei.

Ha kane ka jingialang la iadonlang naduh u Dy CEM JHADC, u Ma Lasky Rymbai, U Winning Garland Syngoh, U Phasmon Dkhar, Brightstar Chyrmang, u Octomewot Lamin, Saron Pasweth nalor kiwei kiwei ki MDC ka Liang synshar.

Ka jingialang jong ka Joint Party Committee, jong ka kynhun United Democratic Alliance (UDA) kaba iatreilang ka NPP, UDP bad BJP, kaba la iasoh dangshen kala kren sani bha bad rai ban khot ia kren baroh ki nongialam ka JHADCSA bad ki ophisar na ki tnad bapher bapher jong ka konsil.

U Chief Executive Member (CEM) jong ka Jaiñtia Hills Autonomous District Council (JHADC) ma Thombor Shiwat haba kren bad ki nongthoh khubor hadien ka jingialang ula ong “Ngi sngewthuh iaka jingeh ki nongtrei ka konsil bad dang shen shuwa ka lockdown-kaba la pynjari ban ïakhun iaka khlam COVID-19, ngi la khot iakren iaki bad la kyntu ba kin iai shah bad ka Exective Committee namar ba ka tulop kim nym duh bad ba ki dang ap ban pyllait ka sorkar Jylla ban pyllai iaka bhah na ka khajna mar pohkhyndew.”

Haba kylli, katno ka pisa ne khajna kaba ka konsil ka dang dei ban ioh? Ka jubab u Ma Thombor ka long “Naka khajna dewiong (Major Mineral- T.81,37,89,540/-, bad naka ka khajna Mawshun (Minor Mineral)- T.16,08.55,885. Baroh ka khajna kaba ngi dei ban ioh la lap hadien ba kala dep pynbeit iaka jingkhein da ka tnad AG ka pisa kaba ngi dei ban ioh kalong T.97,46,45,425/-.”

Ula ong shuh shuh “Lada ïa kane ka pisa ka sorkar kan pyllait, lada khein malu mala haka jinglut kaba T.6 klur shibnai ka tulop nongtrei kumno kumno 15-16 bnai ngi dang lah ban siew tulop jong ki nongtrei.”

Kumta ki nongtrei jong ka konsil kim dei ban khuslai jingmut ne sheptieng namar ba ka pisa ka don bad ka sorkar jylla bad ka Executive Committee ruh kam shym la shong kli kti bad kan wad ki lad ki lynti ban pynioh iaka tulop jong ki nongtrei.

“Ngi la dep buh tarik ban iakynduh bad u CM ka Jylla u Conrad K Sangma, hynrei hadien bala pur ka khlam COVID-19 ha Jylla la pynsangeh noh bad dei namar kane ka juban lak kaba nga la khlei ïaki nongtrei ka konsil kam shym la urlong,” ong u Ma Thombor bad pynpaw ka jingsngewsih halor ka rai kynsan ki nongtrei ba sangeh trei bad ban shim ka bor halade haduh ban khang khydep iaki kamra treikam baroh.

U Ma Thombor ula kren bynniaw ruh halor ka jinglong dieng pynkiang ka Sorkar Jylla ïaki plan bad ki jingthmu jong ka konsil ban wad ki lad ki lynti ban pynmih pisa. Ula ai nuksa ba ka jingthmu jong ka konsil ban buh khyrdop-Monitoring Check Gate ban jurip iaka rung ka mih ki mar pohkhyndew ha ki kharkhana dewbilat ruh ka sorkar kam shym la ai jingmynjur.

Nalor kata kiwei kiwei ki jingtyrwa bala ai ka konsil sha ka sorkar ban pynbha iaka kam jngohkai bad ki kiwei ki kam ban kyntiew iaka iarong pisa ka konsil, bun ki sahkut tang haka jingiakren namar bym ailad ka sorkar ba ka konsil kan iaid shakhmat.

Ka sorkar Jylla imat kam kwah ba ka JHADC kan khie rasong ba kan lah ban kyrshan dalade ialade, hynrei i kumba ka sorkar ka kwah ban pynduh pyndam iaka konsil, kaba dei maka kaba bat iaka khydew ka shyiap bad kiwei ki hok longtrai katkum ka riti pyniaid kam jong ka konsil, ula ong u ma Thombor.