JHADC: Pynhiar dor u Thombor Shiwat iaka bor ka iktiar ka EC ha khmat ki dolloi

Syllad | The Rising MeghalayaFebruary 9, 2021

Ki dolloi ki dei ki nongiarap ne ki agent jong ka Jaiñtia Hills Autonomous District Council (JHADC). Ki dolloi ki dei ruh tang kum ki shakri jong ka JHADC ban iarap iaka konsil ban pynbeit iaki khajia majia ha u pud u sam ne ka khyndew ka shyiap jong u paidbah nongshong shnong ha ki elaka bapher bapher.

Phewse kane ka Executive Committee (EC), JHADC kaba ialam da u ma Thombor Shiwat kum Chief Executive Member (CEM) kala shim iaka rai kaba pynhiar dor iaka bor ka iktiar jong ka konsil bad kan dei ka nuksa kaba sniew hadien habud.

Kam pat ju jia haka history jong ka konsil ba ka EC kan hap ban pyndem tdong ha khmat ki dolloi da kaba soi iaka MOU (Memorandum of Understanding/Agreement) ban pynkup bor iaki dolloi ban lum khajna katkum ka riti ka dustur hapoh ki Elaka.

Katkum ka JHADC Acts, Rules, Regulations etc, haka appointment and Succession of Chiefs and Headman, ki Dolloi ki lah ban shim tang dan na ki ber elaka ha ki iew ki hat, hynrei ym ban buh khyrdop ne ban pynlong kamai kajih (trade) da kaba buh iaki khyrdop.

Mynta ka EC u ma Thombor kala rai ban buh da ki khyrdop haka ki surok bah da ka jingiatreilang ban buh khyrdop Dolloi ban lum khajna na surok bah.

Ka thymmei khubor kaba iohlum ka iathuh shuh shuh ba EC bad ki dolloi ki ia bhah 60-40 ia ka jingioh na kine ki khyrdop.

Ki MDC ka BJP kila pynpaw ka jingpyrshah kaba jur halor kane namar ba ki kam kiba rit kiba ria naduh ki marrep ruh kin hap ban siew khajna ha kine ki khyrdop jong ki dollloi.

“Kane ka executive committee Ka JHADC hapoh ka jingialam u Thombor Chiwat CEM JHADC ki la hiar sha ki cement factory ha Lumshnong ha u snem 2020 da ka jingthmu ban buh ia ki monitoring gate hynrrei hangne kim nud ki la buh pynban ban khrong na ki mar rep kiba mih kamai da ki tyngka ki leh klet pat ia kine ki factory kiba pynmihh da ki crore. Ngi ki MDC ka BJP ngi pyrshah jur ia kane bad ngi pynrem ruh ia kane ka EC kaba la pyndem tdong haka khmat ki dolloi,” la ong ki MDC naduh u Dawan Lyngdoh, Krison Langstang bad u Lakhon Biam kiba dei ki MDC ka JHADC.