Jied biang ka Khliehtyrshi ia u Kitbok Rymbai kum u Waheh Chnong

Syllad | The Rising MeghalayaNovember 22, 2022

U paidbah nongshong shnong ka Khliehtyrshi ula jied biang ia u Ma Kitbok Rymbai kum u Waheh Chnong ba thymmai jong ka na ka bynta ka samoi treikam kaba lai snem 2022-25.

Kane kan long ka sien kaba san ba u Kitbok Rymbai ula shah jied kum u Waheh Chnong ka Khliehtyrshi.

Ia kane ka jingjied waheh chnong la pynlong haka sngi ba Ar hapoh ka jingpyniaid u Dalloi Elaka Jowai ma Puramon Kynjing.

Hadien ka jingiathep vote la pynlong iaka jingniew vote ha ka juh ka sngi ha iing dorbar ka shnong Khliehtyrshi ha Mookynniang.

U Dalloi ula pynbna ba na ki saw ngut ki nongialeh iaka kam Waheh Chnong, u Kitbok Rymbai ula ioh vote 1327, Jesse Dkhar u la ioh 672, Ram Dkhar 59 bad u Hamjngai Dkhar 243.

Ha kane ka jingjied waheh chnong thymmai la sakhi ba ki paidbah naduh ki samla kynthei shynrang haduh ki rangbah bad ki longkmie kila mih ryntih ban jied ia u waheh shnong ba thymmai ka Khliehtyrshi.