Jied ia u syntiew shijur phin ioh ym tang u MLA, hynrei u MP ruh u ban shakri ia phi: O’Brien

Syllad | The Rising MeghalayaFebruary 14, 2023

U MP ka Trinamool Congress na West Bengal Derek O’Brien haka sngi ba ar ula ong “jied ïa u syntiew shijur phin ïoh ym tang ïa u MLA hynrei phin ïoh ruh ïa u MP u ban shakri bad iatreilang ryngkat ryngkat bad u MLA jong phi.”

U Brien ula ong ia kane haba kren haka jingialang ialap elekshon u ma Andrew Shullai ha Iawmusiang, Jowai. Une u MP ula ong ba ka Trinamool Congress kan ïai bteng ban ïasiad ban ïakhun na bynta ban pyntreikam ïaka Inner Line Permit (ILP) ha Meghalaya bad ka jingithuh noh ïaka ktien Khasi haka khyrnit ba phra jong riti synshar jong ka Ri India.

Ula ong ba ka party ka la dep rah ïa kitei ki artylli ki mat haka Parliament ban dawa na ka sorkar kmie ban pynurlong noh ïaka jingangnud ki paidbah ka Meghalaya.

Une u nongïalam ka TMC, ula kyrpad ïaki paidbah ba kin ai ka jingshaniah ïaka party TMC ba kan lah ban wanrah ka jingkylla hapoh ka jylla hadien ka election.

Une u nongïalam ula kular ba lada u kyrtong ka TMC u wan haka thong ka jingjop un hiar sha Jowai saw sien haka shisnem na bynta ban sngap ïaka khia ka shon jong ki paidbah bad ban wanrah ruh ka roi ka par hapoh ka Constituency.

Ula ïathuh ïaki katto katne tylli kiba mat kiba donkam kiba ka party TMC ka buh thong ban leh na bynta ka jylla lada kan ïoh ban thaw ïaka sorkar, kata ban pynmih haduh 3 lak tylli ki kam 1000 tyngka shibnai bad 12,000 tyngka shisnem sha kito ki samla ki bym pat ïoh kam ioh jam.

Nalorkata yn ai jingkyrshan ei da ka pisa ba 1000 tyngka shibnai bad 12,000 tyngka shi snem sha baroh ki longkmie na kawei ka longïing.

Ula kynthoh ruh ïa kiwei ki party ki bym juh rah ïaki mat ka Jylla Meghalaya ha ïing dorbar thawaiñ ha parliament, ula ong ka UDP kadei ka party trai ri kam don wat tang uwei u MP, katba ka NPP kaba don ar ngut ki MP hynrei ki ïoh thiah hapoh Parliament bad dei tang ki MP jong ka TMC kiba don 37 ngut kiba rah ïaka mat jong ka Jylla Meghalaya hapoh Parliament.

Katkum ka jingkheiñ kaba la saphriang (opinion poll), ka TMC ha Meghalaya kam duna ban ïoh 18 haduh 23 seat kumta ym donkam shuh ïa u Conrad Sangma bad ka party NPP hapoh ka Jylla, la ong O’Brien.

Lada ki paidbah ki kwah ban pynduh pyndam ïaka BJP tang kawei kin leh da kaba shon ka muhor haki syntiew shijur haka 27 tarik une u bnai.

U Andrew haba kren ula ther tyngeh ia u MLA ka Jowai Wailadmiki Shylla halor ka jingslem ban tei iaka Iawmusiang kaba thymmai namar ba u kwah ba kiba haiing jong u kin trei ia kane ka kam.

U ma Andrew uba long ruh u MDC ba mynta ula ong ruh ba u kynum jong u Wailadmiki Shylla u Sniawbhalang Dhar, myntri ka tnad urban affairs u dei ban shim jingkitkhlieh halor ka ñiut kaba la ktah iaki nongshong shnong Jowai.