Jied nongkitkam ba thymmai ka KSU Nongbareh Unit

Syllad | The Rising MeghalayaJune 17, 2019

JOWAI: Ka Khasi Students’ Union (KSU) Nongbareh Unit sa shisien kala lah ban pynthymmai biang iaki nongkitkam ba pura jong ka naka bynta u snem 2019-2022 haka sngi Saitjaiñ.

U samla Rapborlang Nongrum uba long u Publicity Secy Ka KSU Sengkmie haba ai jingkren haka jingpynsmai iaki dkhot ula ong ” Ban kit ban bah ia la ka Jaitbynriew kadei ka kamram kaba ngi hap ban trei khlem ka jingiohnong lane khlem ka jingkhmihlynti ba kaei ka KSU ka ai iaphi lane kaei kaba ka Jaitbynirew ka ai iaphi, hynrei kadei ka bynta ka jongphi ban nohsynniang ia la ka Jaitbynriew ha ka jinglah ka bor ka jong phi”.

Haba phai shaka jingduna jong ki Samla kiba mih ban shakri iaka Jaitbynriew ula ong, “Ki samla mynta ki la duna shibun kiba mih ban kit ban bah ia la ka Jaitbynriew, lada ngi peit hangtei hapoh shillong bad sha ki khap sor ruh ngi iohi bun ki la klet noh iaka mynsiem ban shakri bad nohsynniang iaka Jaitbynriew ym kum haki por kiba mynshwa”.

Shuh ula ong ruh ba ka jingbuh iaki Unit jong ka Seng ha kylleng ka bri U Hynniewtrep bad shabar ruh, kam shym mut tang ban pynbun paid ne pynbun Unit, hynrei kadei ka jingthmu ban pynmih iaki samla ki ban shakri iaka jaitbynriew bad khamtam ban peitngor iaka jingma kaba ap iaka ri bad iaka jaitbynriew baroh kawei.

Katba u Samla Laitphar Syngkrem , President ka KSU War Jaintia Circle haba ai jingkren haka jingialang u la ong ba ” Ka por kaba mynta kamdei shuh ka por kaba ngin pynjur khambun daka ktien , hynrei ka dei ka por kaba ngin pynjur khambun daka kam”.

“Ngi khot ngi wer iaki samla kiba don ka Mynsiem ban shakri iaka Jaitbynriew ban mih shakhmat khlem buhteng namar ka jaitbynriew mynta ka donkam eh iaki Samla ki ban leh eiei naka bynta ka Jaitbhnriew” ula ong shuh shuh.

Kiwei pat kiba ai jingkren haka ne ka jingialang pynthymmai iaki nongkitkam ka Nongbareh Unit ki long u Garland Shadap Manner General Secy ka KSU JHDU, U Ma Thirteen Sumer Asst Secretary Shnong ka Nongbareh bad kiwei kiwei.

Ki nongialam bad dkhot thymmai Nongbareh Unit kiba shim ka jingkular ban trei na ka bynta ka bha ka miat ka imlang ka slong ki long u Balajied Pohlong President, Ksanbor Pohtam Vice President, Subha L Rymbui General Secy, Kolet Tang Asst General Secy , Fullmoon Pohlong Finance Secy bad 25 ngut ki dkhot.