Jingïaseng Crusade ha Jowai 11-13 Risaw: Mana ban pynjakhlia, ym shah die jingdie & rukom ïaid kali

Syllad | The Rising MeghalayaOctober 10, 2019

JOWAI: Ka Jingiaseng Kynthei jong ka Jowai Presbytery kan pynlong ia ka Jingiaseng Crusade naduh ka 11-13 tarik u Risaw 2019 ha madan Jrisalein, Chutwakhu, Jowai.

Haka sngi Thohdieng bad ka Saitjain ka jingïaseng kanlong haka por 6.30 PM bad haka Sngi U Blei haka por 10. AM, 1.30 PM bad 6.30 PM. Ki nongialap ha kane ka jingïaseng ki long u Rev. RR Cunville bad Rev. Bechitter Singh.

Ka Jingiaseng Kynthei ka la ïaleh ban pynkhreh bha ha kane ka jingïaseng bad kan long ruh ka nuksa kan ïaleh katba lah ban leh khuid bad mana ruh ba ym bit ban bret pathar ia ki kot ki sla, plastic bad kiwei kiwei kiba pynjaboh ia ka mariang, ha kaba yn buh ruh ïa ki synduk lane ki kriah ban bret ia ki niut. Ka Jingiaseng kynthei ka la rai ruh ban ym shah ïa baroh kiba die jingdie ban buh jaka die tiar bad ki Volunteers kin don ban peit ia kane ka bynta haka jaka long jingiaseng.

Kumjuh ruh ha ka jingiadei bad ka rukom pyniaid kali khamtam ha ka sngi U Blei,  u Superintendent of Police, u Deputy Superintendent of Police incharge Traffic da ka jingiatreilang ryngkat ruh ka Traffic Committee jong ka Jingiaseng Kynthei Crusade hadien ka jingjurip kala pynbeit iaka rukom iaid kali haka Sngi U Blei.

Yn shah ban rung tang haduh 9.30 AM bad ban iaid shaduh Khimusniang kumjuh ruh kiba wan na Khimusniang sha Iawmusiang. Hadien 9.30 AM kiba kwah leit sha Khimusniang kin iaid na u surok Govt Boys – indoor Hall Khimusniang, kumjuh ruh kiba wan na Khimusniang kin iaid na une u juh u surok bad mih sha u surok Chutwakhu/Pohskur.

Nangta ki kali kiba wan na kine ki jaka yn dang ailad ba kin buh ia ki kali kumne, ia ki kali kiba wan na Mynthong sha Jrisalein kin rung sha ka surok Chutwakhu lane surok ban kiew sha Govt Boys; ia ki kali kiba wan na HK Singh sha Jrisalein kin rung lyngba ka surok sha Govt Boys’ HSS. Ki kali kiba wan na Chutwakhu Wah kan long ka No Entry sha Madan Jrisalein, hynrei kin kiew sha u surok ba mih sha Meghalaya studio sa rung sha u surok HK Singh Skul.

Ki Jaka Pyniengkali tang shiliang ha ka surok Govt Boys, Chutwakhu, Khimusniang, Mynthong, ha District Library Mynthong, Parking Lot (Balang Jowai), bad tang kiba ioh Car Pass kiba lah ban rung sha jaka long jingiaseng ha madan Jrisalein. Yn ym shah pynieng kali ha u surok naduh skul HK Singh haduh Jrisalein. Ka jingkyrpad na ka Jingiaseng Kynthei Jowai Presbytery ka long ban iaishah bad iatreilang na ka bynta ka jingiaid beit bad ba kan ym pynthut iano iano ruh.