Jingpynbeit iaid kali ha sor Jowai ban iaid beit ka jingpynpoi ia ki kor EVM

Syllad | The Rising MeghalayaFebruary 19, 2025

Khnang ban pynthikna ia ka jingiaid beit iaid ryntih ha ka leit ka wan jong ki kali kiba don ha ka elekshon duty ha ka por ba wanrah iaki kor Electronic Voting Machine (EVMs) sha iing dorbar thawain ka JHADC hadien ka jingiathep vote, ka Tnad pulit ka Jylla ka la pynbeit bniah ha kaba iadei bad ka leit ka wan jong ki kali ha sor Jowai ha ka 21 tarik Rymphang naduh ka por 2 baje nohphai sngi shaneng.

Katkum kane ka jingpynbeit yn ym shah rung ia ki kali na lad Thomas Jones sha Ophis DC, na Tpep-Pale sha Iawmusiang, Mission Compound Road sha Iawmusiang/ Ophis DC, na H.K. Singh Tri-Junction sha Ophis DC, bad na  Dawki Stand sha Ophis DC.

Kan don ka jingpynkylla ia ka lynti iaid jong ki kali na ka liang Riatsiatsim sha Mynthong (Sha ka liang ka District Library) bad ka liang Khimmusniang/Jrisalein sha ka surok Chutwakhu bad ka liang jong ka New Hill / surok Jowai- Shillong sha Kynruh Saphlang bad surok Thomas Jones.

Ia baroh ki saw tylli ki jaka pynieng kali ha Iawmusiang yn pynkynriah noh naduh ka por 3:00 baje nohphai sngi.