Jingpynshai halor ka jingkynnoh pyrshah ia u Emlang Laloo

Syllad | The Rising MeghalayaMay 23, 2024

Ka jingmih khubor kaba dang shen kaba kam halor ka jingshah kem jong u Bah Emlang Laloo na West Jaintia Hills ka la wanrah ka jingklumar jingmut hapdeng kiba bun balang.

Ha u kyrwoh, la pynpaw ba katkum ki khubor la kam ba kane ka jingkem ia une u briew ha kaba iadei bad ka jingkynnoh kam lehbein iaka khynnah la ong ba ka la jia ha u snem 2023.

Hynrei, mynta la pynshai ba u Laloo u la dep lypa ban lait jamin hashwa ba kine ki khubor hamsaia kin saphriang. Ka iingkashari ka la ai jamin ia u ha ka 20 tarik Jymmang 2024, kata hadien ba ka la bishar bniah ia baroh ki bynta kiba iadei bad kane ka case.

Kane ka jingkynnoh ka dei naduh u snem 2023 ha kaba ym shym la tip thikna ruh ia ka tarik, bnai lane ia ka por ba la jia. Kumta ruh la kyntu ia ki paidbah ba kim dei ban shim mardor da kumwei pat halor kane ka bynta.

Ki jingshisha kin sa paw tad hadien ba ki pulit ki la dep ban pynlong ia ka jingtohkit kaba bniah.

Katba ka jingtohkit ka dang iai bteng, ka long kaba kongsan ban kiar ban poi sha kaba kut hynrei ban ap ia ki jingpynthikna lyngba ki bor sorkar.

Lah ban kdew ba kane ka jingpynmih khubor ka dei kaba la pynshong nongrim lyngba ka jingujor jong kawei ka longkmie lyngba ka jingthoh ha ka 17 tarik u Jymmang 2024, ha kaba la kynnoh ba u Emlang Laloo u la lehbein ia ka khun kaba dang 9 snem jong ka ha ki artylli ki jingjia kiba la jia ha u snem 2023 hapoh ka iingsah jong u, kata ha ka por ba ki dang shong kum ki nongsah wai. Halor kane la rejistar case hapoh Jowai PS hapoh ki kyndon jong ka section 3(b)/4 POCSO.