Jingsngewnguh na ka ïing ka sem I (Late) Titos Manar

Syllad | The Rising MeghalayaNovember 16, 2022

Ngi na ka ïing ka sem jong i (Late) Titos Manar i ba la khlad noh ha ka 01 tarik Naiwieng 2022, ngi pynpaw ïaka jingsnewnguh kaba khraw nyngkong eh ïa u Blei Nongbuh Nongthaw uba la kyrshan bor ïa ngi ha kum kane ka por kaba la pynpait ïaki dohnud jong ngi, dei da ka jingaiei ba phylla jong U, ba ngi kum ka ïing ngi nang ïoh ka bor ban shaniah lut haka jingïeit bad ka jingpynïaid kaba maïan ka jong U.

Kum ka ïing ka sem, ngi pynpaw ka jingsngewnguh kaba khraw ïaka Balang Presbyterian Ratacherra, ïaka Dorbar shnong Ratacherra, ka Dong Lateng kumjuh ïa kiwei ki Balang kiba la wan pynshngaiñ bad pyntngen ïa ngi haka jingkhlad noh iba ïeit bathoiñ jong ngi.

Ka jingsngewnguh ka kyrsoi haki dohnud ki jong ngi na ka bynta ka jingpynshngaiñ bad jingpyntngen kaba ngi la ïoh pdiang na ka kur Manar bad ka kur Pohthmi, ki paralok parajor bad ki jan ïing jan sem.

Ngi ai khublei kyrpang ïa u Dr. David Tariang uba la ai ka jingsumar kaba bha eh, ïaka Jaiñtia Journalists Association (JJA), ïaka ophis U Nongsiañ Hima, Batesi TV bad Syllad.com, ïa ka Kong Santa Merry Shylla, ïa u SI. E. Pohchen, ka Khasi Student Union (KSU) East Jaintia Hills District, ki nongtrei ka TopCem bad kiwei kiba la wan pynshngaiñ bad pyntngen ïa ngi hapdeng ki ummat bad ki jingsngewsih.

Ngi pan map lada ngi dang kum klet ban jer kyrteng, hynrei to pdiang ïa kane ka jingsngewnguh kaba kynthup lang ïa phi baroh kiba wan sngewlem ha kato ka sngi.

Kum ka ïing ka sem ngim don eiei ban siew kylliang, hynrei tang ka jingsngewnguh. To u Blei ka jingsuk un kyrkhu bad don lem bad phi baroh.

“Nga la ïaleh ïa kata ka jingïaleh babha, nga la pyndep ïa la ka jingphet, nga la ri ïaka jingngeit. Naduh mynta ïa nga la buh ïa kata ka pansngiat jong ka hok, ïa kaba U Trai, uta u Nongbishar bahok, un ai ha nga ha kata ka sngi; bad ym tang ha nga hi, hynrei ha kita baroh ruh kiba ïeid ïa kata ka jingmihpaw jong U.

Ka shithi kaba Ar U Paul U Apolstol Sha U Timothi 4:7.

Khublei shibun bad ngi duwai ba U Blei un ïai kyrkhu ïa phi haki por baroh.

Na I Kong Thiangmon Pohthmi (lok), ki khun, ki ksiew, ki khun miaw, ki pyrsa kurim bad ka ïing ka sem baroh.