Jop bun ki nongrah nar na Ri Bhoi haka 3rd State Weightlifting Championship 2024 kaba long ha Jowai

Syllad | The Rising MeghalayaOctober 27, 2024

Ka jingkhlain bad ka jinglah ban rah ia ki nar kiba khiah kala paw shynna ha ki nongialehkai shynrang bad kynthei na kylleng ka rilum Khasi Jaintia kiba la lum lang haka lympung rah nar kaba la tip kum ka 3rd State Weightlifting Championship 2024.

La pynlong da ka Meghalaya Weightlifting Association (MWA) ryngkat ka jingiatreilang ka ophis u District Sports Officer (DSO), West Jaintia Hills. La wan ban iashimbynta da ki 18 ngut ki kynthei bad 27 ngut ki shynrang.

Kane ka jingiakop rahnar ba ar sngi kala sdang haka 25 tarik u Risaw bad kala poi noh sha kaba kut haka 26 tarik u Risaw ha yungwalieh ka Dorbar Shnong Tpep pale Jowai.

Ka jingthmu ka long na ka bynta ban it bad ban pynshlur iaki nongialehkai kiba lah ban mihkhmat sha ka Meghalaya Games 2025 kaban long ha Jowai bad Wahiajer.

Iaki khusnam shaki nongjop la sam da u kongsan MDC JHADC Ma Eveningstar Teron, haka jingdonlang u District Sports Officer (DSO) Ma Khroobok Passah, u Working President ka Meghalaya State Olympic Association (MOSA) Bah John F. Kharshiing, u President Meghalaya Weightlifing Association (MWA) Bah Donald Rymbai nalor kiwei kiwei.

Ia kane ka jingiakop la wan ban pyniaid da ki dkhot jong ka Arunachal Weightlifting Association kiba kynthup ka Biku Satita International Referee CAT-2, ka Techi Nadam bad Takio Yana Tagru kiba dei ki National Referee CAT-2.

Na ki shynrang, haka 49 KG haka kyrdan Youth, iaka nam lahduh la rah da u Wansameki Buhroy na East Khasi Hills, u Febragas Lyngdoh na East Jaintia Hills ula wan ba ar bad David Lyngdoh na Ribhoi ula wan ba lai.

Haka 55 KG haka kyrdan Junior, u Iakmenlang Kharkongor na Ribhoi ula iohrah iaka nam lahduh, u Jewel Lyngdoh bad Damebeithi Tang kiba na West Jaintia Hills kila wan ba ar bad ba lai.

Haka 61 KG jong ka kyrdan Junior, u Sahryngkat Marboh na Ribhoi ula long u lahduh, u Wanbhabiang Thabah na Ribhoi ula wan ba ar bad u Amanfield Ryngtathiang na East Khasi Hills ula wan ba lai.

Haka 67 KG haka kyrdan Junior, iaka nam lahduh la iohrah da u Gerald Thabah na Ribhoi, ba ar bad ba lai la ioh da u Lamjingmut Lamare bad Lamphrang Suiam kiba na West Jaintia Hills District.

Haka 55 KG jong ka kyrdan Senior, iaka nam lahduh la ioh da u Iaikmenlang Kharkongor na Ribhoi, ba ar u Mark Brandon Suiam na East Jaintia Hills bad ba lai Banshanborlang Bareh na East Khasi Hills.

Haka jingkhia kaba 61 KG haka kyrdan Senior, iaka nam lahduh la rah da u Biangbok Umbah na Ribhoi, ba ar bad ba lai la rah da u Jeffrey Jonathan Kharnadu bad Banshanborlang Bareh kiba na East Khasi Hills.

Haka jingkhia kaba 67 KG haka Senior, iaka nam lahduh la rah da u Anastasius Ryndongsngi na Ribhoi bad ba ar u Calten Sari na West Jaintia Hills.

Haka jingkhia kaba 73 KG Senior, u Banteiskhem Lyngdoh na Ri Bhoi ula rah iaka nam lahduh katba u Winningstar Dhar bad Samebiang Passah kiba na West Jaintia Hills kila wan ba ar bad ba lai.

Na kaliang ki kynthei, haka jingkhia kaba 49 KG haka kyrdan Youth, ka Forky Suchen na East Jaintia Hills kala khur iaka lahduh katba ka Zamareen Kurkalang na East Khasi Hills kala wan ba ar.

Haka 59 KG Junior, ka Isalarica Lapang kala khur iaka nam lahduh, ba Ar ka Ialaarica Lapang kiba na South West Khasi Hills bad ba lai Forky Suchen na East Jaintia Hills.

Haka 55 KG Junior, ka Larityngkai Lawriniang na Eastern West Khasi Hills kala khur iaka nam lahduh katba ka Balawanshwa Kharkongor na Ribhoi kala wan ba ar.

Haka 71 KG Junior, ka Deiphibanri Lyngdoh kala khur iaka nam lahduh katba ka Phibabetbha Kshiar kala wan ba ar baroh ar kidei na East Khasi Hills.

Haka 49 KG Senior, iaka nam lahduh la khur da ka Isalarica Lapang, ba ar Ialarisa Lapang kiba dei na South West Khasi Hills bad ba lai ka Alisha Grace Syiemlieh na Ribhoi.

Haka 59 KG Senior, iaka nam lahduh la ioh da ka Ibanrihun Maring na Ribhoi, ba ar bad ba lai la ioh da ka Bavaria Shullai na West Jaintia Hills bad ba lai la ioh da ka Jasmie Ibakor Kharphuli na East Khasi Hills.

Haka 71 KG Senior, ka Aieibanity Lyngdoh na Ribhoi kala khur iaka nam lahduh, ka Ibalaioh Khamtilut Namsaw na Ribhoi kala wan ba ar bad ka Yoolangki Niangti na West Jaintia Hills kala wan ba lai.