Jop bun kol ka Newhill haka Third Div, pynliem ka Panaliar iaka Katholik Youth Mihmyntdu haka ID Cup

Syllad | The Rising MeghalayaAugust 9, 2024

Ka Newhill kala jop 6-0 kol pyrshah iaka Mustem East haka jingialehkai Third Division Football, katba ka Panaliar kala jop da 3-2 iaka Katholik Youth Mihmyndtu haka Independence Day Cup U-17 Football Tournament kaba long haka 8 tarik Nailar ha Kiang Nangbah Stadium.

Ia kine ki ar tylli ki tournament la pyniaid da ka West Jaintia District Sports Association (WJDSA).

Haba phai sha ka jingialehkai Third Division, ka nam jop ka Newhill kala wan dei ka jinglah ialehkai bha jong ka, kaba tang hapoh 5 minit bala iaid ka jingiakhun kala ioh ban thep iaka kol kaba nyngkong lyngba u Simion Suchiang (5′), ka kol kaba ar balai la thep da u Redi Talang (own goal) (22′), Hamedamanbha Thma (37′). Ha ka kylla miet u Lamdame Sumer (42′), Dapoimi Dkhar (55′) bad Meno Suchen (70′).

Kawei pat ka jingialehkai ka Chyrmang Wah kala pynliem da 2-1 iaka Dongnein Sohmynting. Ia kine ki ar kol ka Chyrmang Wah la thep da u Arkiru Bang (32′) bad u Apsar Khlem (56′), katba iaka kol jong ka Dongnein Sohmynting la thep da u Chemi Lyngdoh (63″).

Ha ka jingialehkai Independence Day Cup, ka namjop ka Panaliar kala long kaba salit pyrshah iaka Katholik Youth Mihmyntdu.

Ka Katholik Youth Mihmyntdu, kaba wan nadien kala khyrwit ar kol ban ban haka minit kaba 53′ bad 60’+1 kiba la thep da u Honesty Chyrmang bad u Teilang Phawa. Katba na kaliang ka Panaliar kala thep ia kine ki lai kol lyngba u Ram Passah (25′) bad u Damehi Phawa (44′, 60′).

Haka jingialehkai kaba bud, ka Pateinki Sabah bad ka Lutituber Ialong kala kut da kaba iakhaid mar 1-1. Na kaliang ka Pateinki Sabah la thep da u Mar oo Shylla 5′ bad iaka kol jong ka Lutituber Ialong la thep da u Pynkmaimi Phawa (own goal) (50′).