Jop ka 1917iTEAMS iaka khusnam ‘4th Digital Transformation Awards 2021’ ba pynkylla dur iaka kam rep kam riang ha Jylla

Syllad | The Rising MeghalayaNovember 19, 2021

Ka 1917iTEAMS kaba dei ka project jong ka tnad Agriculture, sorkar Meghalaya ka lah ioh ia ka nam lahduh ha ka ‘Digital Transformation in Agriculture’ ha ka 4^th Digital Transformation Awards 2021 (Recognising Excellence in e-Governance) bala pynlong ha ka 18^th tarik u Naiwieng 2021 lyngba ka online platform namar ka jingpyndonkam ka jong ka ia ki bor Information Technology ha ka rukom trei kam kaba long ka lad jingiarap ia ki nongrep ha ka rep ka riang ka ri India.

Lyngba ka jingai jingmut u P Sampath Kumar, IAS, Ex- Commissioner & Secretary, Agriculture, ka 1917-Integrated Technology Enabled Agri-Management System (1917iTEAMS) kadei ka rukom pyntreikam thymmai kyrpang na ka bynta ki nongrep ha kaba iadei bad ka iew ka hat lyngba ka cloud based facilitation service na bynta baroh ki nongrep hapoh ka jylla Meghalaya. La sdang ia kane ka project ha u bnai Nohprah 2017 ban pyniasnoh ia ki nongrep bad ka iew ka hat, da kaba pynbiang ia ki  kali ha ka dor kaba biang bad ban ai jingtip kham bniah shaphang ka rep ka riang. Da ka jingdon mynta palat  88,000 ngut ki nongrep, 600+ ki nongthied, 400+ ki Farmer Groups kiba la dep register bad 18 tylli ki kali pick-up Agri Response Vehicles, ka 1917iTEAMS ka ai jingiarap ei lyngba u toll free nomber 1917, ka centralized database, ka Fleet Management System bad ka IVRS System. Ka system kaba pyndonkam kadei kaba la shna kyrpang ryngkat ka jingiatreilang ka Digital India Corporation (DIC) jong ka Ministry of Electronics and Information Technology, Government of India.

Ka 1917iTEAMS ka trei ratbah ban pyniasnoh ia ki nongrep bad ki nongthied bapher bapher kiba na ka jylla, na ka thain shatei lam mihngi, na ka ri India bad shabar ri ruh kumjuh, kaba la pynkiew ia ka jing shalan ia ki mar rep jong ka jylla sha ki iew ki hat shabar ri. Ia ki kali la pyndonkam da ki shnong bapher bapher, ki nongrep, ki nongkhaii, ki nongthied, ki groups bad ki kynhun bapher, bad kane ka la iarap ban pynpoi ia ki mar na kylleng ki jaka sha ki iew kiba kham heh.

La kyrshan ia ka 1917iTEAMS da ka department jong ka Agriculture & Farmers’ Welfare bad ka ia trei ryngkat bad ki departments jong ka Animal Husbandry & Veterinary, Fisheries, Planning, Finance, Law, Information Technology, Water Resources, Dairy, Ka Indian Council of Agricultural Research (ICAR), Ka Central Agriculture University (CAU), MBDA bad ka State e-Governance Mission Team (S.e.M.T) kaba la wanrah kham jan ia ki mat trei kam jong ka sorkar sha ki nongrep da kaba shu phone. Ka jingtreikam lang bad ka Meghalaya Institute of Entrepreneurship (MIE) kaba lamphrang kum ka PMU barim ka la pynlong ka jingiadei kaba khlain bad ki agripreneurs jong ka jylla bad ka la iarap ia ki ban thied ia ki mar rep na ka jylla baroh kawei bad ban process bad die pat shabar.

Ha u snem 2020, ka 1917iTEAMS ka la lah ban nang pynbun ia ki kali da kaba lum lang ia ki kali iew

ban pyndap ia ka jingdawa ha ka por lockdown. Lyngba kine ki kali ARV, ka 1917iTEAMS ka la lah ban pynduna ia ki jingduhnong ki nongrep da kaba pynkit mar mar ia ki mar rep ha ka por kaba biang. Ki nongthied ruh kiba la dep register bad ka 1917iTEAMS ki la thied bad pynpoi ia ki mar rep sha ki nongdie wholesale bad nongdie dukan ha ka por lockdown. Da ka jingiatreilang bad ka NARI Fresh jong ka East Khasi Hills District Cooperative Milk Union Ltd, ka 1917iTEAMS ka la lah ban iarap ban sam bad pynpoi ia ka Chief Minister’s Quarantine Care Package sha ki 22,375 ki longing ha ka por lockdown. Ha ka lockdown mynta u snem 2021, ka 1917iTEAMS lyngba ki Home Delivery Agencies, ka pyntrei kam ruh da ka farmgate procurement model ban thied beit na ki nongrep na ki shnong bapher bapher.