Jop ka Demthring iaka Wahiajer, rah syndon iaka 11th Chatister Kharkongor Memorial Trophy

Syllad | The Rising MeghalayaNovember 18, 2023

Ka Demthring kala jop da 2-1 pyrshah iaka Wahiajer bad rah syndon iaka nam lahduh jong ka First Division Football Tournament-kaba la tip kum ka ’11th Chatister Kharkongor Memorial Trophy’ kaba pyniaid da ka West Jaintia District Sports Association (WJDSA).

Haba phai shaka jingiakhun phainal kaba long ha madan Kiang Nangbah Stadium haka sngi Saitjain, ka jingialehkai kala long kaba shongshit bad ka Demthring kala tam shakhmat tang hapoh 2 minit bala iaid ka jingiakhun lyngba ka kol kaba la thep u Maidong Mukhim.

Hadien kane ka kol, ka Wahajer ruh kala sdang ban kyntiew lem iaka sur ialehkai ka jong ka bad kala pyrshang har rukom ki jingpyrshang ban ioh dep kol.

Dei haka minit kaba 25 ka Wahiajer kala ioh ban thep shikol lyngba u nongialehkai ba pawkhmat jong u Niwan oo Gatphoh.  Da kane ka kol ka jingiakhun haka kyllastep kala kut da kaba iakhaid.

Pynban haba la bteng biang iaka jingialehkai haka kyllamiet ruh kine ki arliang mamla kim shym la ioh ban pynkhih iaka jar bad rah iaka jingialehkai sha ka extra time kaba 20 minit.

Dei hadien bala rah iaka jingialehkai sha ka extra time la lah ha kaban rai iaka namjop. Ka Demthring kala pyntam shikol ha ka minit kaba 104 bad kane ka kol kala neh haduh bala kut ka por ialehkai. Ia kane ka shikol la thep da u Lounidajied Ryngkhlem kaba la biang pura iaka Demthring ban rah iaka nam lahduh.

Da kane ka namjop ka Demthring kala ioh rah iaka song pisa 30 hajar tyngka katba ka Wahiajer kaba wan ba ar ka la ioh iaka song pisa kaba 20 hajar tyngka ryngkat ka Trophy.

Ka khusnam Man of the Match la ioh da u Babitlang Dkhar, ka nam Best Goalkeeper la iohrah da u Fourme Dkhar. Baroh ar ngut kine ki nongialehkai ki dei na ka kynhun jong ka Demthring. Ka nam Top Scorer la iohrah da u Nidaioh Dhar jong ka Mukhla Evergreen bad ka nam Player of the Tournament la iohrah da u Dawanbiang Passah jong ka Nangbah Iawmusiang.

Ha ka aiom ialehkai ban wan ka Demthring bad ka Wahiajer kin ialehkai haka kyrdan jong ka Super Division.

U kongsan ban wan sakhi ia kane ka jingialehkai u dei Finely Pariat, general secretary Meghalaya State Olympic Association uba dei ruh u khun jong u Late Chatister Kharkongor haka jingiadonlang ki dkhot bda nongkitkam ka WJDSA kynthup ia u Working President u Ma EMH Passah, u General Secretary u Ma Lammat OO Laloo bad kiwei kiwei ryngkat ki paibah kiba la pyndap iaka madan smam.