Jop ka Dulong iaka Demthring haka 1st Division ka WJDSA, haka sngi Nyngkong yn rai mano ban rung semifinal

Syllad | The Rising MeghalayaNovember 4, 2022

Ka Dulong kala jop da 3-1 pyrshah iaka Demthring haka jingiakhun 1st Division Football Tournament ka West Jaintia District Sports Association (WJDSA) kaba long ha Kiang Nangbah Stadium haka sngi Thohdieng.

Kane ka jingiakhun kadei kaba khatduh na ka Pool B bad hadien kane ka namjop jong ka Dulong kala wan haka kyrdan kaba lai haka miej iakhein poin da kaba kamai 9 poin. Na kane ka Pool B, ka Shangpung Moosyiem bad ka Sailung Ialong kila buh jaka ialade haka kyrdan jong ka semfinal mynta ka aiom haka 1st Division hadien ba kila kamai 13 bad 12 poin na ki 5 tylli ki jingiakhun.

Haba phai sha ka jingiakhun ka Dulong bad ka Demthring, ka Dulong kala tam shakhmat naduh ba sdang ka jingiakhun da 2 kol kaba la thep da u Dao chwa Shylla marwei (2′, 16′). Shikol la thep da u Wallam Jingsuk Suting (68′).

Ia ka shikol ka Demthring la thep da u Spain Ryngkhlem (64′).

Ka Demthring na ki 5 tylli ki jingiakhun kala kamai 3 poin, ka Chutwakhu kam shym la ioh iaka jingop wat tang shisien ha kane ka aiom ialehkai na ka pool B.

Na Pool A ka Nangbah Iawmusiang kala rung sha semifinal. Ka resol ka ban mih na ka jingiakhun ka ban long haka sngi Nyngkong ka taiew ka ban wan ka ai ka rai mano ban wan ba ar ban ioh buh jaka haka kyrdan jong ka semifinal.

Ka jingiakhun ba khatduh kan long hadpeng ka Chilliangraij pyrshah iaka Moosalyngkat haka por 12 Pm bad ka Mukhla Raij pyrshah iaka Wahiajer haka por 2:30.

Kat haduh ba thoh iaka khubor, ka Wahiajer ka wan haka kyrdan kaba ar bad katkum ka miej iakhein poin ka don 7 poin, kaba wan ba lai ka dei ka Mukhla Raiij 6 poin, ka Moosalyngkat 4 poin bad ka Chilliangraij 3 poin.