Jop ka Jalapang SC 6-2 iaka Nongdawah; rah syndon iaka Invitation Knockout Football Tournament ka Wahiajer

Syllad | The Rising MeghalayaJanuary 9, 2025

Ka Jalapang SC kala jop da 6-2 pyrshah iaka Nongdawah haka jingialehkai final kaba la pynlong iaka ban rah syndon iaka ‘8th Invitation Knockout Football Tournament’ kaba pyniaid da ka Wahiajer Sports Club ha madan Wahiajer Sports Complex kaba long haka 8 tarik Kyllalyngkot.

Haba phai shaka jingialehkai kala long kaba iathain bha na baroh arliang kynhun, ha kaba jingialehkai haka por kaba la buh kala kut noh da ka jingiakhaid kaba mar 2-2. Dei hadien bala rah iaka jingialehkai sha ka extratime u Kitbok Pale ula khyrwit da ka hattrick hadien ba ula ioh khyrwit lai kol haka extra time (80+4, ET- 87, 89 bad 94). Nalor u Kitbok la thep shikol da u Oliver Pale (57) bad u Kynsai Lhuid (96 ET).

Iaki kol na ka bynta ka Nongdawah la thep da u Chanmitre Thma (40) bad Shano Tariang (65).

U kongsan ha kane ka jingialehkai final u dei u Superintendent of Police, West Jaintia Hills District Ma Chemphang Syrti haka jingdonlang u Waheh shnong Ma Sanwotki Laloo, President Thadlaskein Sports Association Ma Kmenlang Shylla nlor kiwei kiwei.

Hadien ka jingialehkai la sam khusnam sha ka lahduh da ka song pisa kaba 2 lak 30 hajar tyngka, bad ka kynhun kaba wan ba ar 1 lak 20 hajar tyngkat ryngkat ka Trophy.

Ka khusnam shimet ‘Man of the match bad Player of the Tournament’ la rah da u Kitbok Pale, ka nam Top Scorer la ioh da u Stephan Pale uba la thep 7 goal bad ka nam ‘Best Goalkeeper’ la ioh da u Daemitre Dan. Baroh kine ki rangialehkai kidei na ka Jalapang SC.