Jop ka jingpynshang Social Distancing u DC EJH, dawa pynbha shuh bad pynbun dukan ka SBYWA

Syllad | The Rising MeghalayaMarch 27, 2020

Ka jingpyrshang u Deputy Commissioner, West Jaiñtia ban pyntreikam ïaka Social Distancing ne ka jingkiar ban iakhleh ha ki jaka bun briew ha ki jaka paidbah kala jop, hynrei ban kham pynsuk shuh shuh ïa u paidbah ka Southern Border Youth Welfare Association (SBYWA) kala kyntu ïaka bor district ban ailad shuh shuh ban plie sa katto katne ki dukan ha Ladrymbai ban pynsuk ïa u paidbah bad ban pynkloi shuh shuh ïaka rukom thied pet ki nongdie bad u nongthied.

Ka jingai por u DC East Jaiñtia Hills lai kynta ban thied ïaki mar bam mynta ka sngi naduh ka 10 AM-1 baje nohphaisngi kala long kaba jop bad kila ïaroh ïa u DC bad kyntu ban nang pynbha shuh shuh ïa kane ka jingpyrshang da kaba plie bun tylli ki dukan khnang ba ki paidbah kiba wan na nongkyndong kin myntoi.

Ka SBYWA kala kyntu ruh ïaka bor district ban pynpoi mar bam wat sha ki thain Bataw namar ba ki nongshong shnong na kane ka thain kila hiar lut sha Ladrymbai ban leit thied ïaki jingdonkam ka jong ki.

Nalor kata ka SBYWA kala kyntu ban pynpoi ia ki mar bam ha ki shnong khappud kum ka Hingaria, Huroi, Lei Long, Lejri bad kiwei de ki shnong ba don ha khappud kiba shem jingeh ban leit iew leit hat shaduh Khliehriat bad Ladrymbai.

Ka SBYWA ka kyntu ia baroh ki nongshong shnong ba bud ryntih iaka jingbthah ka sorkar ban jop iaka jingiakhun pyrshah ïa u khniang jingpang coronavirus.