Jop ka Khliehrangnah kum ka Best Village Panchayat ha ka National Water Award

Syllad | The Rising MeghalayaOctober 23, 2024

Ka shnong Khliehrangnah, West Jaintia Hills ka la jop ha ka kyrdan kaba lai kum ka ‘Best Village Panchayat’ hapoh ka Ri ha ka jingsam khusnam “5th National Water Awards, 2023.”

Ia kane ka khusnam la aiti da u Myntri ka Tnad Jal Shakti u CR Patil, katba ka President jong ka Ri ka Droupadi Murmu kala plie iaka jingialang ha Vigyan Bhwan, New Delhi ia kaba la khot pynlong da ka Ministry of Jal Shakti, Department of Water Resources, River Development and Ganga Rejuvenation na ka bynta ki kyrdan bapher bapher kiba iadei bad ka jingai jingiada bad pynneh pynsah ia ki um ki wah.

Ki don haduh 38 tylli ki khusnam nam jop ha ki khyndai tylli ki kyrdan kiba kynthup ia ka Best State, Best District, Best Village Panchayat, Best Urban Local Body, Best Water User Association bad Best Civil Society.

Ka Khliehrangnah ka la ioh ia ka jingithuh halor ka nuksa kaba iadei bad ka jingtrei borbah ban pynneh pynsah ia ki um ki wah, kaba kynthup halor ka jingpynthymmai bad pynim biang ia ki 20 tylli ki tyllong um, kata ia kumba 14 tylli ki umpohliew bad 6 tylli ki wahduid. Ki bor pyniaid shnong ki la shna ruh ia ki pung um ba la tih kiba lah ban pynlang um haduh 2,400 cubic meter kaba la kyntiew ruh ia ka jingdon um hapoh ka khyndew jong katei ka jaka. 

Haba pynpaw halor kane ka jingjop u Myntri Rangbah ka Jylla u Conrad K Sangma u la ong, “Ka long kaba sngewkmen bad sngew sarong shibun na ka bynta ka shnong Khliehrangnah kaba la ioh pdiang ia kane ka jingjop ha ka kyrdan kaba lai ha ka ‘National Water Awards 2023’ ha ka kyrdan kum ka ‘Best Village Panchayat.’

Ka jingioh pdiang ia kane ka khusnam ka long halor ka jingshim rai kaba skhem jong ki nongshong shnong kiba ialeh ban pynneh pynsah ia ki um ki wah bad ka jingkut jingmut ba skhem jong ka Sorkar ban pynthikna halor ka jingpyndonkam ia ki jingdon jingem ha ka rukom kaba dei bad ba don ia ka jingkitkhlieh. Kaba kum kane ka jingiatreilang hapdeng ka Sorkar bad ki shnong ki thaw kan kyntiew ia ka jinglong jingman jong ki sawdong sawkun bad kyntiew ia ki lad ban pynneh pynsah.

Ia kane ka khusnam la leit ban shimti da u Bah Lamluti Langstang uba dei u Waheh Shnong ka Khliehrangnah bad u Gunanka DB, IFS, Executive Director, MBMA.

Lah ban kdew ba ka shnong Khliehrangnah ka dei ka la shimti ia ka projek hapoh jong ka Community-Led Landscape Management Project (CLLMP), ia kaba la bei tyngka da ka World Bank bad ia kaba la pyntrei da ka Meghalaya Basin Management Agency (MBMA).

Kane ka jingioh pdiang khusnam ka pyni ia ka jingjop jong ka CLLMP project ha ka ban kyntiew ia ki shnong ki thaw kiba shim ia ki sienjam ban pynneh pynsah ia ki um ki wah bad halor ki kam pynroi kiba neh hapoh ka Jylla.

Ka National Water Award ka dei kaba pynleit jingmut halor ki kam ba bha kaba la leh da ki riew shimet bad ki kynhun bapher bapher ha kylleng ka ri na ka bynta ban pynurlong ia ka thong jong ka Sorkar ka Jal Samridh Bharat.