Jop ka kurim u CM ka Dr Mehtab Chandee ia ka bye-election ha Gambegre; kiew 32 ngut ki MLA ka NPP

Syllad | The Rising MeghalayaNovember 23, 2024

Ka kurim u Conrad Sangma Myntri Rangbah ka Jylla ka Dr. Mehtab Chandee Agitok Sangma kaba dei ruh ka Treasurer jong ka National People Party (NPP) ka la ioh ia ka jingjop kaba donburom ha ka elekshon shiteng samoi ha Gambegre Assembly Constituency da kaba tam haduh 4594 vote pyrshah ia ka kyrtong ba hajan eh jong ka Trinamool Congress ka Sadhiarani M Sangma.

Ka Mehtab Chandee Agitok Sangma ka NPP ka la ioh 42.1% na baroh ki vote kiba long 12,678 vote, katba ka nongiakhun kaba iajan eh ka Sadhiarani M. Sangma na ka All India Trinamool Congress ka la ioh 8,084 vote (26.84%).

U Jingjang M. Marak na ka Indian National Congress u la ioh 7,695 vote (25.55%) katba u Bernard N. Marak na ka Bharatiya Janata Party u la ioh 710 vote (2.36%). Ki arngut ki kyrtong shimet, kata u Jerry A. Sangma bad u Sengkrabirth M. Marak ki la shah ieh shadien bad ki 95 vote jong u NOTA.

Ha kajuh ka por, u Conrad K Sangma lyngba ka Facebook page u la ong, “La thaw histori y Gambegre!

“Ka jingkhublei ka leit sha ki paidbah kiba la ai ia ka jingshaniah ha ka Dr (Mrs) Mehtab Chandee A Sangma bad kyrshan ia ka jingthmu jong ka na ka bynta ka lashai kaba phyrnai. Kane ka jingjop ka long ka jingpynshisha ia ka jingngeit bym lah pynkhih jong phi ha ka jingkiew shaphrang, ka jingiatylli bad ka jingroi,” u la ong.

U la bteng ruh da kaba ong, “Ryngkat, ngin iatreilang ban pynlong ia ka Gambegre kum ka sharak jong ka jingkyrmen bad ka lad ka kabu. Kane kam dei tang ka jingjop na ka bynta ka iing ka sem jong ngi, hynrei na ka bynta iwei na iwei ki nongshong shnong kiba angnud ia ka Meghalaya kaba kham khlain kaba kham bha.”

“Hangne sha ka lynnong kaba thymmai jong ka jingshakri bad ka jingaiti. Gambegre, ka lawei ka dei ka jong ngi ban ia tei lang!” u la bynrap.

Da kane ka jingjop jong ka Dr. Mehtab Chandee ka jingdon jong ki MLA ka NPP mynta ka la kynjoh sha ka 32 ngut baroh.

U Myntri Rangbah ryngkat ka kurim jong u kin dei kiba ar na ki shikurim ki nongthaw ain ha kajuh ka samoi, katba kiba nyngkong ki shi kurim ki dei u Dr Mukul Sangma bad ka kurim jong u ka D Shira.

Ka jingiathep vote na ka bynta kane ka elekshon shiteng samoi ha Gambegre ka la long ha ka 13 tarik Naiwieng ha kaba ka jingdon jong ki nongthep vote kiba wan iashim bynta ka long haduh 30,115 ngut.

Ia kane ka elekshon la hap ban pynlong namar ka jingiehnoh jong u Saleng Sangma MLA ka Seng Congress hadien ka jingshah jied kum u MP ka Tura mynta u snem.