Jop Ka Kynrumlang-I FC & ka Synroplang FC haka Football Knockout ha Pdengshakap

Syllad | The Rising MeghalayaDecember 30, 2024

Ka Kynrumlang-I FC bad ka Synroplang FC kila khur jingjop haka jingialehkai ”11th Pdengshakap Secondary School Football Knockout Tournament” kaba long haka 28 tarik Nohprah.

Ia kane ka lympung la pyniaid daka Dorbar Shnong Pdengshakap.

Haba phai sha ka jingialehkai ka Kynrumlang-I FC kala pynliem iaka River Side FC da 5-3 lyngba ka jingiashut tie-breaker hadien ba kine ki arliang kila iakhaid haka jingialehkai da 0-0.

Katba ka Synroplang FC pat kala jop iaka Be My Fan da 4-2 lyngba ka tie-breaker hadien ba la kut ka jingialehkai da 1-1. Iaka kol jong ka Synroplang FC la thep da u Bantei Kurbah haka minit kaba 33, katba iaka kol jong ka Be My Fan pat la ioh ban pynphai da u Rikut Tariang haka minit kaba 70.

Kane ka jingialehkai kan bteng biang haka 4 tarik K’lyngkot 2025 haka por 12 baje. Ka Amlanai 03 pyrshah iaka Azad AFC 2 katba haka por 2 baje nohphai sngi pat ka Nohron SC pyrshah iaka West Jaintia Police.