Jop ka Laitkor ia ka Mylliem bad rah syndon ia ka nam lahduh ka 2nd Div. Football ka SSA

Syllad | The Rising MeghalayaMarch 5, 2022

Ka Laitkor Sports Club, kaa lah ba kan pynliem noh ia ka Mylliem Sports Club da 2-0, ha ka phainal ka lympung ialehkai ka Second Division Football ba la pyniaid ia ka da ka Shillong Sports Association.

Ha ka jingiakhun ia ka phainal ba la long haka sngi Saitjain ha madan Third ground, Polo, ia kine ki artylli  ki kol, ka Laitkor SC ka la ioh ba kan thep ha baroh ki ar kylla jong ka jingiakhun, ha kaba ka kol ba nyngkong ka Laitkor SC ka la ioh ba kan thep ha ka minit ba 13 lyngba u Euvansius Mawtyhoh bad ia ka kol klaba ar la thep da u Sondyfelix Kharkongor ha ka minit ba 76.

Haba phai sha kane ka jingiakhun, u sawar ka nam ialehkai bha u la noh bha sha ka kynhun ialehkai jong ka Laitkor SC, kaba naduh kaba sdang, ki player ki jong ka, ki la rung madan da ka thong ban rah ia ka nam kum ka lahduh.

Kaba kham pynshoh biej bha ia kane ka kynhun ialehkai jong ka Laitkor SC ka long ba baroh 11 ngut ki rang ialehkai ki jong ka ha madan, ki la ialeh thik kumba la bthah ia ki ban leh hapoh madan.

Ka rukom ban ia pynbuh ia ka bol hapdeng para ba ialehkai, ban pynpra ia ka rukom ialehkai jong ka Mylliem, ha kiba bun ki khep la shem bad iohi ba ka Laitkor SC mynta ka sngi kala pyrshang ban ialehkai beit na madan ne ground ball.

Ka jinglah ban bud ryntih da baroh ki player ia kaei kaba la bthah ia ki ban ialehkai ha madan, kam lah ban khlem da pynklumar hi thlim ia ka kynhun ialehkai jong ka Mylliem SC, kaba mynta hi ka kynti ka da lip hi jar ka rong ne ka rup ialehkai ka jong ka, ha kiba bun ki khep ka jingbym biang position jong ki player ka la plie lad bha ia ka kynhun ialehkai jong ka Laitkor SC ban tehlakam hi skhak ia kane ka jingiakhun tad haduh ban da rah syndon ia ka  nam kum ka lahduh jong kane ka lympung.

U kongsan ba la wan ban don lang ha kane ka sngi dei u President ka SDSA ba dei artad u  MLA ka Mawphlang u bah Eugeneson Lyngdoh, bad na ka bynta ka kynhun ialehkai ka Mylliem SC la wan ban sakhi bad ai mynsiem lem da u MLA ba dei artad u myntri ka sorkar jylla u bah Hamletson Dohling, nalor katta la wan ruh ban sakhi lang da u Syiem ka hima Mylliem u Pa’iem Ainam Manik Syiem, ryngkat ka jingia don lang ki dkhot nongkit kam ka Shillong Sports Association.

Da kane ka jingjop ka Laitkor SC ka la ioh ruh ba kan khung ia ka song pisa kaba long 50 hajar tyngka, katba ka Mylliem kaba la shah rem kan khung ia ka song pisa ba 25 hajar ryngkat ki medals bad ka trophy.