Jop ka Lakasein bad ka Jalaphet Bri Sumer haka Super Div ka SBSA

Syllad | The Rising MeghalayaNovember 1, 2023

Ka Lakasein SC bad ka Jalaphet Bri Sumer SC ki la khur jingjop haka lympung ialehkai Super Division Football League ba la pyniaid da ka Saipung Block Sports Association (SBSA) kaba long ha Lamyrsiang haka sngi ba Ar.

Haba phai sha ka jingialehkai ka Lakasein SC ka la lah ha kaban pynliem da 2-0 iaka Jarain SC. Ia kine ki ar kol la thep da u Edamon Palem marwei kiba la wan haka minit kaba 66′ bad 78′.

Haka jingiakhun kaba bud, ka Jalaphet Bri Sumer SC ka la pynliem da 3-2 iaka Latyrke SC. Na kaliang ka Jalaphet Bri Sumer SC ia kine ki lai kol la thep mar shikol da u Plidar Dkhar 28′, u Ioanis Chyrmang 65′ bad u Bing Chyrmang 82′. Katba na kaliang ka Latyrke la thep ia kine ki ar kol da Bankyrshan Syiemlieh 34′ bad Iaisnoh Dkhar 70′.

Haduh bala thoh iaka khubor, ka Jalaphet Bri Sumer kala wan haka kyrdan kaba nyngkong haka miet iakhein poin kaba la kamai 6 poin na ki ar sien ialehkai, bud sa ka Mulait United FC- 6 poin bad iapher na ka jingioh thep kol. Ka Narwan SC bad ka Shnongrim SC mar 4 poin, ka Latyrke SC, ka Tluh SC, Lamyrsiang SC bad ka Lakasein SC ki kamai mar 3 poin.

Katba ka Jarain SC bad ka Mynthning SC kim pat ioh khur namjop ha kane ka aiom ialehkai.

Haka 2 tarik Naiwieng ka jingiakhun kan long hapdeng ka Mynthning SC bad ka Narwan SC haka por 11.30 baje mynstep, ka Jalaphet Bri Sumer SC bad ka Mulait United FC haka por 1.30 nohphai sngi.