Jop ka Latyrke bad ka Mulait haka 1st leg semifinal ka Saipung BSA

Syllad | The Rising MeghalayaSeptember 27, 2022

Ka Mulait United FC bad ka Latyrke SC kila jingjop haka jingïakhun 1st leg semifinal jong ka lympung ialehkai Super Division Football Tournament kaba pynïaid da ka Saipung Block Sports Association (SBSA).

Haka jingiakhun kaba long haka sngi ba ar ha Lamyrsiang, ka Mulait United FC kala jop 1-0 pyrshah iaka Lamyrsiang. Kane ka shikol kala mih paw haka dur jong ka own goal kaba la thep da u Riki Phawa (11′). Kane ka shikol kala neh haduh bala wai ka por iakhun.

Ka Latyrke SC pat kala lah ban pynliem da 2-1 pyrshah ïaka Jalaphet Bri Sumer SC. U K.Lalchhuan Sanga (8′) bad u Vanlaldon Hmar (23′) kila thep iaki kol ka Latyrke, katba shikol ka Jalaphet Bri Sumer la thep da u Bantei Shylla (47′).

Ka 2nd leg semifinal kan long haka 1 tarik u bnai Risaw ha kaba Jalaphet Bri Sumer pyrshah iaka Latyrke haka por 12.00 baje nohphai sngi bad ka Lamyrsiang pyrshah ïaka Mulait United FC haka por 2.00 nohphai sngi.