Jop ka Lion da 6 wicket iaka Ummulong haka Open To All Cricket ka WJHDCA

Syllad | The Rising MeghalayaApril 14, 2023

Ka Lion SYA kala jop da 6 wicket pyrshah iaka Ummulong Sc haka Open To All Cricket Tournament kaba pyniaid da ka West Jaintia District Cricket Association (WJHDCA) kaba long ha madan ialehkai ka shnong Khliehtyrshi haka sngi Thohdieng.

Ka Lion kaba la jop iaka toss kala ailad iaka Ummulong ban tied shuwa ha kaba na kaliang ka Ummulong kala liem lut baroh 10 wicket hapoh 17.4 over bad buh iaka thong kaba 97 run. U Rejoice Gassah (21) bad u Wellmanson Passah (18) bad kiba kamai ar dak jingkhien. U Wellmanson ula khur ruh 2 wicket ha kane ka jingiakhun.

U Namewanki Pakyntein ula khyrwit 4 wicket naka 5 over bad ula khur ruh iaka khusnam man of the match. Nalor u Namewanki, u Dauni Laloo bad u Deibormi Rangad kila khur mar ar wicket.

Ka Lion haba beh iaka thong kala pyndep tang hapoh 15.1 over. Ki batsmen kiba synniang sha ka jingkamai run ka Lion ki dei u  Sanki Pakyntein (23), u Kitbok Rangad (22) bad u Nik Dan (22).