Jop ka Mawsiang FC Pateinki Sabah haka Football Third Div ka WJDSA

Syllad | The Rising MeghalayaApril 18, 2022

Ka Mawsiang FC Nongkhroh bad ka Pateinki Sabah kila khur jingjop haka jingiakhun Third Division Football- ka 2nd Adelbert Laloo Memorial Trophy kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka sngi Nyngkong.

Kane ka namjop ka Mawsiang FC Nongkhroh kala wan pyrshah Iong I Dahi da 4-3 kol, ka Pateinki Sabah kala pynliem 2-0 iaka Khliehmyntdu Neinchong.

Kawei pat ka jingiakhun hadpdeng ka Saindur Mihmyntdu pyrshah iaka Khliehmuchut Shangpung kala wai da kaba iakhaid mar 2-2 kol.

Haba phai sha ka jingiakhun ka Mawsiang pyrshah Iong I Dahi, ka Mawsiang FC kala la tam lypa sha khmat da 3 kol haka kylla step. Ia kine ki kol la thep da u Pyndapbiang Myrboh (5), Desiders Pyrtuh (18) bad u Rio Myrboh (45). U Myrboh ula thep ruh iaka kol kaba saw haka mint 79 kaba dei artad ka kol jop.

Na kaliang ka Iong I Dahi FC haka kylla miet kala ioh thep lai kol lyngba u Confirm Sana (55), Stingbha Dkhar (67) bad Denis Lyngdoh (75).

Haka jingiakhun ka Pateinki Sabah pyrshah Khliehmyntdu Neinchnong, baroh ar tylli kine ki kol ka Pateinki Sabah kala thep haka kylla step lyngba u Lakhon Dkhar (18) bad u Trei Shylla (41).

Haba phai pat sha ka jingiakhun ka Saindur Mihmyntdu pyrshah iaka Khliehmuchut Shangpung, ka jingiakhun hadpeng kine ki arliang mamla kala long kaba iakhaid bha bad kila ia tynjuh bor mar kylliang ban ioh thep kol.

Dei haka kylla miet ba kine ki ar liang mamla kila ioh ban pynkhih iaka jar. Iaka kol kaba nyngkong thep da ka Khliehmuchut lyngba u Arwan Phadong (48) bad kane ka kol kala neh haduh bala jan wai ka por iakhun.

Ka Saindur Mihmyntdu hadien ka jingshah tam da shikol kala pyrshang har rukom ki jingpyrshang ban ioh pynphai bad dei tad haduh ka minit kaba 74 kala ioh ban tan kylla iaka jingiakhun lyngba u Damon Rymbai (74) bad tang hapoh ar minit kaka ioh ban ban sa shikol lyngba u Azariah Lamare (76).

Hynrei kane ka kol kam shym la neh slem bad tang hapoh shi minit bala iaid biang ka jingiakhun, ka Khliehmuchut kala ioh ban pynphai kylla lyngba u Elizer Suiam (77) uba la pynbuh bha dalade iaka bol bad ula khyrwit iaka kol kaba u nongap kol ka Saindur um lah satia ban kyrda.