Jop ka Moopliang haka 2nd Div, lashai ka semifinal 3rd Div jong ka WJDSA

Syllad | The Rising MeghalayaSeptember 2, 2024

Ka Moopliang kala jop da 4-2 pyrshah iaka Nangbah Dukhu haka jingialehkai 2nd Division Football Tournament – 7th Debo Shullai Memorial Trophy kaba pyniaid da da ka West Jaintia District Sports Association (WJDSA) kaba long ha Kiang Nangbah Stadium haka 2 tarik Nailur.

Shuwa kane ka jingialehkai hapdeng ak Dongmihsngi pyrshah iaka Madankynsaw Mowkyndeng kala kut da kaba iakhaid khlem don mano mano ba ioh pynkhih jar.

Haba phai sha ka jingiakhun ka Moopliang bad ka Nangbah Dukhu, ka Moopliang kala tam shakhmat 2 kol haka kylla step lyngba ka kol kaba la thep da u Byforce Star Dhar (20), Sebastian Rymbai (42). U Sebastian (52) ula thep biang sa shikol haka kyllamiet bad sa Riciest Star Dhar (59).

Ar kol na kaliang ka Nangbah Dukhu la thep da u Lainuntura Nampui (49) bad u Shlaimon Padit (72).

Ka jingialehkai 3rd Division kaba la jam sha ka semifinal, kan long lashai ka sngi 3 tarik Nailur hapdeng ka Newhill pyrshah iaka Lumpyrtuh Mihmyntdu haka por 3.00 baje nohphai sngi. Ka semifinal kaba ar kan long hapdeng ka Myrjai pyrshah iaka Mulang Ialong haka sngi kaba bud.