Jop ka Nongtalang Chnongthmai haka Lower Div, iakhaid ka Super League hapdeng ka Dongmihsngi Mupyut VS Lumpyngngad

Syllad | The Rising MeghalayaNovember 12, 2024

Ka Nongtalang Chnongthmai kala jop da 1-0 pyrshah iaka TSC Jong U Chen, ka Amalri Model bad ka Amsalang bad kumjuh ka Krangpamtadong bad Ammutong Pyrshang kala kut da kaba iakhaid haka Lower Division. Katba ka Super League kala kut da kaba mar 1-1 hapdeng ka Dongmihsngi Mupyut bad ka Lumpyngngad.

Ia kine ki lympung ialehkai la pyniaid da ka Amlarem Sub Divisional Sports Association (ASSA) ha madan Mini Stadium Lajaplem, Amlarem haka 12 tarik Naiwieng.

Haka jingialehkai jong ka kyrdan Lower Division, hadpeng ka Krangpamtadong SC bad Ammutong Pyrshang ka jingialehkai kala kut da ka jingiakhaid khlem da lah ban pynkhih jar.

Haka jingialehkai kaba bud, ka Nongtalang Chnongthmai kala khur jingjop da kaba pynliem iaka TSC Jong U Chen da 1-0 bad ia kane ka kol jong ka Nongtalang Chnongthmai la thep da u Mahrhen Lyngdoh haka minit kaba 11.

Ha kawei pat ka jingialehkai ruh kala kut da ka jingiakhaid kaba mar 1-1 hapdeng ka Amlari Model bad Amsalang SC.

Iaka kol jong ka Amasalang SC la thep da u Mebanklet Tariang haka minit kaba 7 katba iaka kol jong ka Amlari Model la thep da u Mehi Pala haka minit kaba 10.

Haba phai shaka jingialehkai Super League ruh ka jingiakhun kala kut da ka jingiakhaid kaba mar 1-1 hapdeng ka Dongmihsngi Mupyut bad Lumpynngad SC.

Iaka kol jong ka Lumpynngad SC la thep da u Domi Surong haka minit 19 bad iaka kol jong ka Dongmihsngi Mupyut la thep da u Elas Phawa haka minit kaba 36.