Jop ka North Liberty HSS, Assam Rifles bad kiwei haka sngi sdang ka State Level Subroto Mukherjee Cup

Syllad | The Rising MeghalayaJuly 10, 2024

Ka lympung ialehkai phutbol ba bna nam jong ki skul ka jylla ka State Level Subroto Mukherjee Cup Football Tournament, kaba pyniaid ia ka da ka tnat jong ka Directorate of Sports & Youth Affairs ka la sdang haka 9 tarik Naitung, ha ki lai tylli ki madan ialehkai ba don ha ka nongbah, katta ka SSA Stadium First Ground, ka MFA Turf Third Ground, bad Madan Heh Stadium.

Haba phai sha ki resol na ka jingialehkai ka sngi ba nyngkong ha ka U-15 ki khynnah shynrang, ka kynhun ialehkai jong ka Dapborlang Giri Memorial Secondary School kaba dei na West Khasi Hills ka la lah ba kan pynliem noh ia ka Khliehriat Presbyterian Higher Secondary Secondary School na East Jaintia Hills da 4-0.

Ia kine ki kol jong ka Dapborlang Giri Memorial Secondary School la thep ia ki da Aiborlang Sangriang (2 min), Savio Kupar Marwein (12 min), Fredyson Lyngdoh (25 min) bad Iohborlang Lyngkhoi (32 min).

Ka Govt Boys Higher Sec. School kaba dei na West Garo Hills kala jop da 2-1 iaka Govt Boys Higher Sec. School South Garo Hills. Ia kine ki kol la thep da u Vivian Ch. Marak (15) bad Wanchiang K. Marak (34). Shikol ka Govt Boys’ SGH la thep da u Saint Zecharia D Shira (36).

Katba ha ka U-17 ki khynnah shynrang, ka Assam Rifles Public School kaba dei ka lahduh nangne napoh ka East Khasi Hills ka la lah ba kan pynliem noh ia ka Monfort Secondary School, West Garo Hills da 4-1

U namtam ha kane ka jingiakhun naka bynta ka Assam Rifles Public School dei u Ricky Kharkongor uba la lah ban lam khmat ia la ka jong ka skul ban thep haduh lai tylli ki kol ne hat trick kiba la wan ha ka minit kaba 6, 27, 53 bad sa shi kol la thep ia ka da u Phermanbha Lyngdoh ha ka minit kaba 44.

Katba ia ka shi kol ban lait brut ka Monfort Seconday School, la  thep ia ka da u Dongkam M. Marak ha ka minit kaba  29.

Ka North Liberty Higher Secondary School ka lahduh na West Jaintia Hills kala pynliem da 4-1 iaka Lotus Secondary School-East Jaintia Hills. U Rio Marboh ula kylla long u namtam hadien ba ula  ula khyrwit 4 kol (8, 11, 32, 51). Shikol ka Lotus Secondary School-East Jaintia Hills la thep da u Vishal Lyngdoh (46).

Ka Tenset Secondary School- South West Khasi Hills kala jop da 2-1 iaka Okapara Secondary School South West Garo Hills. U Aiborlang Kharjahrin (2) bad u Badap-jingkyrmen Nongrum (24) kila ioh the pia kine ki ar kol, shikol na ka Okapara la thep da u Weltin S Sangma.

Ka Songsak Agilogre Hig. Sec. School kaba dei na East Garo Hills) kala jop da 2-0 iaka Sibsingh Memorial Govt. Higher Sec. School, West Khasi Hills.U Bipiush Marak (4) bad u Vrikam Sangma (52) kila ioh thep ia kine ki ar kol

Haba phai pat sha ka jingiakhun ka U-17 ki khynnah kynthei, ki lai tylli ki kol ne hat trick ka Larihun Songthiang (6, 37, 60) ka la biang pura ia ka kynhun ki thei ialehkai ka Tyrsad Higher Secondary School ka East Khasi Hills ba kan pynliem noh ia ka Dambok Aga U.P School South Garo Hills da 7-0.

Ia ki kol kiba sah jong ka Tyrsad HSS la thep pat ia ki da ka Ibashembha Khongsit (3, 11 min) Medariiaka Kharkongor (15 min) bad ka Nishalin Nongrum (40 min).

Katba ka North Liberty Higher Secondary School kala jop da 3-0 iaka Dalia Sec. School, West Garo Hills). Ia kine ki kol la thep da ka Peacefully Pohplet (10), Deigracia Dann (34) bad Eiladki Ksoo (51).

Ka Kynsai Govt. L.P & U.P School, West Khasi Hills kala jop 1-0 iaka Nongehram Adunai Higher Secondary School (East Garo Hills). Ia kane ka kol la thep da ka Younisha Thabah (20).

Ka Christian Higher Sec. School (Ri-Bhoi) kala jop da 4-0 iaka Jakrem Presbyterian Higher Sec. School, Southwest Khasi Hills. Ia kine ki 4 kol la thep da ka Daiamon Makroh (26,55), Rilinda Ingti (43) bad ka Darika Rani (46)