Jop ka Pasyih 11 kol iaka Khliehshnong Ialong, khyrwit hattrick Nickboy ka Mookyrdup

Syllad | The Rising MeghalayaApril 30, 2022

Ka Pasyih CSC kala jop kput haduh 11-1 kol pyrshah iaka Khliehshnong Ialong bad u Nickboy Swer ka Mookyrdup ula khyrwit hattrick haka Third Division Football – Ka 2nd Adelbert Laloo Memorial Trophy kaba pyniaid ka WJDSA kaba long ha ka sngi Saitjain ha Kiang Nangbah Stadium.

Haba phai sha ka jingiakhun ka Pasyih CSC pyrshah iaka Khliehshnong Ialong, ka jingiakhun hi naduh ba sdang kala long kaba jem shilliang bad tang hapoh 3 minit bala iaid ka jingiakhun ka Pasyih kala tam 1 kol. Ia kane ka kol la thep da u Pynsakhiat Siangshai uba la thep iaka kol ba ar jong u ka minit kaba 65.

U Damewan Bang (50, 78) ula thep ar kol bad mar shikol na u Phem Dkhar (8), Hammyllien Dkhar (11), Shaniah Dkhar (18), Budhokmiki Rymbai (43), Shiningstar Rymbai (41), Samuel Siangshai (63) bad u Deiwi Rymbai (77)

Shi kol ka Khliehshnong Ialong la thep da u Chemiki Pale (23).

Haba phai sha ka jingiakhun ka Mookyrdup pyrshah iaka Tympang, ka Mookyrdup kala jop 6-0 kol. U Nickyboy Swer ula lam lynti iaka Mookyrdup ban ioh iaka namjop kaba bun kol hadien ba ula khyrwit da ka hattrick (9, 23, 27, 76) ha kaba marwei ula thep 4 kol bad la iarap lang sa mar shikol da u Famous Plain (52), Felix Dkhar (52)

Ha ka jingiakhun kaba khatduh hapdeng ka Moodymmai pyrshah iaka Nangbah Khloopano ka jingiakhun kala wai da kaba iakhaid mar 2 kol.

Na kaliang ka Nangbah la thep da u Amos Dhar (26), Ban Lamare (26) bad na ka Moodymmai la thep da u Benison Rymbai (33) bad u Teibok Pakma (66).