Jop ka Rising Star & Khliehtyrshi haka T20 Cricket ka AJCA

Syllad | The Rising MeghalayaMarch 24, 2021

Ka Rising Star bad ka Khliehtyrshi SC ki la khur jingjop haka lympung ïalehkai kriket Open To All T20 Cricket Tournament kaba pynïaid da ka All Jaintia Cricket Association (AJCA) ha madan Jrisaleiñ, Chutwakhu Jowai haka sngi Balang.

Ka Rising Star ka la pynliem ïaka Lion Sports & Youth Affair da 6 wickets katba ka Khliehtyrshi Sports Club ka la pynliem ïaka Khimusniang da 5 wicket haka jingïakhun ka ba la long mynta ka sngi ha madan Jrisaleiñ, Chutwakhu.

Haba phai sha ka jingïakhun ka Lion Sports & Youth Affairs kaba la tied nyngkong kala kamai 127 ron na ki 20 overs bad hap noh 6 wickets.

U Kitboklang Rngad ula kamai 34 ron (3×4 bad 1×6), u Jemi Laloo ula kamai 27 ron (6×4).

Haba beh ïaka thong ka Rising Star ka la kamai 128 ron na ki 12.2 overs bad hap noh 4 wickets.

U Yutang Kma ula kamai 69 ron (5×4 bad 7×6), u Ben Nongtdu ula kamai 19 ron (3×4) khlem out, u Dauni Laloo jong ka Lion Sports and Youth Affairs ula pynhap 2 wickets na ki 3 overs.

Haka jingïakhun kaba bud ka Khimusniang ka jop ïaka jingkynting pisa bad kam trai ban tied shuwa bad haka jingtied ka la kamai 143 ron na ki 20 overs bad hap noh 8 wickets.

U Nibiangmon Sutnga ula kamai 32 ron (2×4 bad 3×6), u Daohi Passah ula kamai 22 ron (5×4), u Timi Ryngkhlem jong ka Khliehtyrshi Sports Club ula pynhap 3 wickets na ki 4 Overs.

Haba beh ïaka thong ka Khliehtyrshi Sports Club ka la kamai 146 ron na ki 19.1 overs bad hap noh 5 wickets.

U Conard R Sana ula kamai 65 ron (8×4 bad 4×6), u Hopper Rymbai ula kamai 51 ron (6×4 bad 2×6) khlem out, u Pynilynti Bareh bad u Jeffrey Litting jong ka Khimusniang ki la pynhap mar 2 wickets na ki 4 overs.

Lashai ka sngi 25 tarik ka jingïakhun kan long hapdeng ka Ummulong pyrshah ïaka Chutwakhu haka por 9:00 mynstep, ka 4-Mowkaiaw United pyrshah ïaka Hills United Cricket Club.