Jop ka Seiñ Kynjei FC haka 7 Aside Knockout Football ka Panaliar

Syllad | The Rising MeghalayaApril 17, 2022

Ka Seiñ Kynjei FC kala jop da 3-0 kol pyrshah iaka LMK FC haka sngi sdang ka 7 Aside Knock Out Football Tournament kaba pyniaid da ka Sports & Games Committee jong ka shnong Panaliar kaba long ha madan ialehkai ka Panaliar haka sngi Saitjain.

Shuwa ka ban sdang ka jingïakhun kala don ka jingïalang lyngkot ba la pynïaid da u Owaker Pasweth Chairman S&G Committee bad ka nguh Blei na u Tista Paswet.

U Waheh shnong ka Panaliar u Riquoma Rq. Laloo haka jingkren ula ong kino kino ki jait jingïalehkai ki long kiba donkam namar ki ïarap bad pynïoh ha u briew ïaka jingkoit jingkhiah.

Ula kitbok kitrwiang bad ai mynsiem ïa baroh ki kynhyn ban don ka mynsiem ïalehkai haba ki don ha madan khnang ba ka jingïalehkai kan long kaba itynnad.

U Justice Lyngdoh Waheh shnong Rymbai uba long u kongsan haka jingkren ula ïaroh ïaka shnong Panaliar kaba la pynlong ïa kiba bun ki jingïalehkai. Ula pynkynmaw ba haki snem kiba mynshwa ula juh ïashim bynta bad ka shnong Panaliar haka Bamphalar bad kane ka pyni ïaka jingïeid ka shnong Panaliar ïa u kumba ma u ruh u ïeid ïaka shnong Panaliar.

La ïadonlang ruh u General Secretary ka shnong u Careme Phawa, u Treasurer u Jait dao Sumer bad kiwei kiwei ki nongkitkam shnong. Ïaka jingïalang la pynkut da ki kyntien ai khublei na u Sienmitre Sumer, Secretary, S&G Committee Panaliar.

Haba phai sha ka jingïalehkai ka Seiñ Kynjei ka la pynliem ïaka LMK FC da 3-0 kol. Ïa kine ki kol la thep da u Deimon Shullai (OG), u Raplangki Marboh bad u Dashngaiñ Sukhlaiñ.