Jop ka Shillong iaka All Jaintia CA da 43 run, haka final Zone 1 ka Inter District U-19 Boys Cricket

Syllad | The Rising MeghalayaApril 30, 2022

Ka Shillong Cricket Association team B kala jop da 43 run pyrshah iaka All Jaintia Cricket Association (AJCA) haka jingiakhun final naka Zone 1 haka Inter District U-19 Boys Cricket kaba pyniaid da ka Meghalaya Cricket Association (MCA) ha madan Khliehtyrshi haka sngi Saitjain.

Da kane ka namjop ka Shillong CA team B kan aireng pyrshah iaka East Garo Hills Cricket Association haka 2 tarik u bnai Jymmang ha Tura.

Ka Shillong CA (B) kaba la jop iaka toss kala tied shuwa haka jingiakhun kaba mar 15 over namar ka jingsniew ka suinbneng.

Naduh ba sdang ka Shillong CA B kala ialehkai bha bad 59 run la kamai ki shi jur kiba kynthup ia u Manthan Dey (41 naka 26 ball) bad Shubham Rasailly (21 naka 24). Nalor kine ki ar ngut u Kshitij Singhania (17) bad Dipankar Barua (28) bad haduh ba kut ka 15 over kala kamai 128/5

Na kaliang ki nongkwang bol ka AJCA, Satemitre Bareh (2/15) Puraki Shadap Passah (2/22) kila khyrwit mar ar wicket.

Haba poi ka pali jong ka AJCA ban beh iaka thong ka suki bha ka jingkamai run jong ka bad ki nongtied jong ka kila ialehkai tang ban lait hap wicket bad la lap ba lut ka 15 over bad liem 6 wicket bad kamai tang 85 run.

U Chwamiki Ryngkhlem bad Saibormiki Passah kila kamai mar 23 run sha u sup u thiar kamai run ka AJCA. U Dawanchwami Passah u la synniang 17.

U Jerimaiah L Kynshi ula lah ban khyrwit 4/9 wicket bad kane kala buh jingeh iaka AJCA ban khieh khlieh ha kane ka jingiakhun kaba kala hap ban pdiang ia kane ka namrem.

U Jerimaiah da kane ka jingialehkai bha ula khur iaka khusnam Player of the Match