Jop ka Sohmynting Khliehmyntdu Neinchnong & ka Lumkhangdong haka 3rd Div ka WJDSA

Syllad | The Rising MeghalayaJune 14, 2023

Ka Sohmynting Dongnein, ka Khliehmyntdu Neinchnong bad ka Lumkhangdong Kyndong Tuber kila khur namjop haka jingiakhun 3rd Division Football Tournament kaba pyniaid da ka West Jaintia District Sports Association (WJDSA) ha madan Kiang Nangbah Stadium Jowai haka sngi Balang.

Haba phai sha ka jingiakhun ka Sohmynting Dongnein ka la pynliem ïaka Umshangiar da 1-0. Ïa kane ka shikol la thep da u Wanmi Kyndait haka minit kaba 46.

Haka jingïakhun kaba bud ka Khliehmyntdu Neinchnong Mihmyntdu ka la pynliem ïaka Pateinki Sabah da 2-1.

Ïaki kol jong ka Khliehmyntdu Neinchnong Mihmyntdu la thep da u Arkini Chyrmang haka minit kaba 21 bad u Bandaia i Ryngki haka minit kaba 54 katba ka Pateinki Sabah la thep da u Prayme Kyndait haka minit kaba 11.

Ka jingïakhun kaba khatduh ka Lumkhangdong Kyndong Tuber ka la pynliem ïaka Nangbah Mooknor da 3-2.

Ïaki kol jong ka Lumkhangdong Kyndong Tuber la thep da u Damepaia Shylla haka minit kaba 5 bad 37, bad u Fourki Chyrmang haka minit kaba 28.

Ïaki artylli ki kol jong ka Nangbah Mooknor la thep da u Pynshngain Hinge haka minit kaba 40 bad u Poimidanial Thubru haka minit kaba 54.

Lashai ka sngi ka jingïakhun kan long hapdeng ka Lutituber Ïalong pyrshah ïaka Youth Social Walfare Pynthor haka por 12.30 baje shiteng sngi, ka Mulang Ïalong pyrshah ïaka Madan Thadmuthlong haka por 2.00 baje nohphai sngi bad ka Lumpyrtuh Mihmyntdu pyrshah ïaka Royal Pole Mihmyntdu haka por 3.30 baje janmiet.