Jop ka sur u paidbah ïaka politik, shah jied u Kitbok kum Waheh Shnong Khliehtyrshi

Syllad | The Rising MeghalayaDecember 10, 2019

JOWAI: Ka Sur jong u paidbah kala jop ïaka ka politik bad sa shisien kala jied ïa u ma Kitbok Rymbai kum u Waheh Shnong jong ka Dorbar Shnong Khliehtyrshi. Ka shnong Khliehtyrshi baroh kawei ka shaniah tylli ha une u rangbah uba la bat ïaka kam Waheh Shnong la lai samoi bad kala pynjop don burom ïa u.

Kane ka jingshaniah ka Khliehtyrshi ha une u rangbah kala paw shai haka elekshon kaba la long haka sngi ba Ar kaba la pynlong da u Dolloi jong ka Elaka Jowai, u Ma Puramon Kynjing.

Ha kane ka elekshon u ma Kitbok ula ioh vote haduh 1501 bad kiwei pat ki kyrtong Stamly Dkhar ula ioh vote 79 bad u Sainmi Rymbai 55 vote na ki 1682 ngut ki nongshong shnong kiba la wan ïashimbynta ban jied ïa u Waheh Shnong thymmai.

U Dolloi jong ka Elaka Jowai u ma Puramon Kynjing uba pynïaid ïa kane ka elekshon ula pynbna ba u ma Kitbok ula jop don burom.

Also Read: Sma politik hak ka kam jied waheh shnong ha Khliehtyrshi, pyndam ka JHADC iaka elekshon

Ha kane ka juh ka sngi la jied ruh ia u Ma Sainmi Rymbai kum u Assistant Waheh Shnong, Chairman u Ma Stamly Dkhar, Secretary u Ma Besar Rymbai, Assistant Secretary u Ma Hamedeibor Phawa bad Treasurer u Ma Ram Ryngkhlem. Ki Auditor u ma Kitborlang Phawa bad ka Kong Safeful Shylla bad kiwei kiwei ki dkhot jong ka Executive body.

Kumban shu pynkynmaw ba kane ka jingjied Waheh Shnong kala poi sha ka  ïing bishar Meghalaya High Court hadien ba la ujor mukotduma Ma Kitbok Rymbai, Waheh Shnong barim jong ka Khliehrtyshi pyrshah ïaka JHADC bad kiwei kiwei katkum ka  WP(C) No. 488 of 2019 bad ka WP(C) No. 468 of 2019.

Also Read: Pynkut ka ïingbishar ïaka mukotduma u Kitbok Rymbai pyrshah ïaka JHADC, 10 tarik Nohprah ka elekshon Waheh Shnong

Ka iingbishar kala rai rem iaka JHADC kaba la pyndam ïaka rai u Dolloi ban pynlong elekshon kaba la thmu ban pynlong haka 21 tarik u Risaw. Ka iingbishar kala hukum iaka JHADC ban phah ïa u Dolloi ban pynlong ïaka jingjied Waheh Shnong thymmai haka 10 tarik u Nohprah 2019. Kane ka elekshon jied Waheh Shnong kala iaid beit iaid ryntih hadpeng ka jingpahara jong ki Pulit.